Թուրքական Haber7 լրատվական գործակալության փոխանցմամբ՝ Թուրքիայի խորհրդարանը ստեղծել է հատուկ հանձնաժողով, որը դիտարկելու է 1960-ական թվականների սկանդալային գործերը: Պատգամավորները որոշել են արխիվներից դուրս բերել և դիտարկել կախաղան բարձրացված Թուրքիայի վարչապետ Ադնան Մենդերեսի գործը:
Հանձնաժողովի գործունեության նպատակը հայտնի քաղաքական գործչի անվան վերականգնումն ու նրա հետմահու արդարացումն է: Ադնան Մենդերեսին կախաղաղն են բարձրացրել 1960 թվականին իրականացված ռազմական հեղաշրջման հետևանքով: Մինչ այդ նա աչքի է ընկել բարեփոխումներով և ամրապնդել է Թուրքիայի տնտեսությունը:
1959 թվականին տեղի ունեցած ստամբուլյան ցույցերից հետո Մենդերեսն ուժով հեռացվել էր իշխանությունից և կախաղան բարձրացվել: Այժմ Մենդերեսի գործի վերանայումը մեծապես վրդովել է թուրքական հասարակությանն ու լրատվամիջոցներին:
Մեկնաբանելով ստեղծված իրավիճակը՝ ընդդիմադիր քաղաքական գործիչներն ընդգծում են, որ իշխող «Արդարություն և զարգացում» կուսակցությունը չի հանգստացել և հետագայում նույնպես ճնշումներ է գործադրելու զինվորականների նկատմամբ՝ նպատակ հետապնդելով չեզոքացնել նրանց ազդեցությունը իշխանության վարչական ճյուղերից:
Հիշեցնենք, որ Ադնան Մենդերեսը Թուրքիայի վարչապետ է եղել ուղիղ 10 տարի՝ 1950 թվականի մայիսից մինչև 1960 թվականի մայիսը: Նրա կառավարման տարիներին է Թուրքիան մասնակցել Կորեական պատերազմին և անդամակցել ՆԱՏՕ-ին, ինչպես նաև նրա օրոք են եղել1955 թվականի սեպտեմբերի 6-7-ը հույների ու հայերի ջարդերը:
Մենդերեսը իսլամական լայն գործունեություն է ծավալել երկրում, ինչը հակասել է Աթաթուրքի հռչակած վեց սկզբունքներից մեկին՝ լաիցիզմին, որը կրոնն անջատում էր պետությունից: Մենդերեսի այդ գործունեությունը, ի վերջո, լցրեց Աթաթուրքի կողմից ավանդված երկրի աշխարհիկ ռեժիմի հիմնական պահապան զինվորականների համբերության բաժակը, որոնք էլ 1960 թվականի մայիսի 27-ին գահընկեց արեցին նրան:
Ադնան Մենդերեսը կախաղան բարձրացվեց 1961 թվականի սեպտեմբերի 17-ին Մարմարա ծովի Իմրալը կղզում, ուր 1999 թվականից ցմահ ազատազրկում է կրում քուրդ առաջնորդ, PKK-ի հիմնադիր Աբդուլլահ Օջալանը: