Հռոմի պապ Ֆրանցիսկոսը նոյեմբերին կայցելի Թուրքիա՝ մասնակցելու սբ Անդրեասի հիշատակի արարողությանը, ինչպես նաև կրոնների երկխոսությունը կարևորելու նպատակով:
Զմառի մշակութային կենտրոնի տնօրեն Մովսես Վրդ. Տոնանյանն «Առաջին լրատվական»-ի հետ զրույցում նշեց, որ
պապը, ըստ ամենայնի, կայցելի Թուրքիա, ապաև Հայաստան, թեև պաշտոնական տեղեկատվություն այդ կապակցությամբ դեռևս չկա:
Պապի այցը, նրա խոսքով, կարևորվում է հատկապես 2015թ. Ցեղասպանության հարյուրերորդ տարելիցին ընդառաջ, և այցը մեծ նշանակություն կունենա: Հայր Մովսեսի խոսքով՝ պապը նաև կոչ կանի վերջ տալ Մերձավոր Արևելքում քրիստոնյաների սպանություններին։
«Գիտեք, որ 2015-ի փետրվարին Վատիկանը իր արխիվների գիրքը պետք է հրապարակի, որում վկայություններ կան Հայոց ցեղասպանության մասին, ժողովրդի չարչարանքների մասին: Սա մեծ վկայություն է, որը կցնցի աշխարհը: Երբ պապը կարդինալ էր, անշուշտ, Թուրքիային ասել է, որ պետք է ընդունեն Հայոց ցեղասպանությունը»,- ասաց նա՝ հավելելով, որ կարևոր է նաև Վատիկանի քաղաքականությունն այս հարցում:
Անշուշտ, որպես պապ՝ նրա խոսքն ավելի մեծ արժեք ունի, և իհարկե պետք է այդպես լինի, բայց, մյուս կողմից, զրուցակցիս խոսքով՝ Վատիկանի քաղաքականությունն էլ է կարևոր. Վատիկանում պապն առանձին չի գործում, և շատ հակառակ դիրքորոշումներ կան, շատ են հակառակը պնդող քաղաքագետները:
Նրա խոսքով՝ Վենետիկի համալսարանի հայագիտության ամբիոնի հիմնադիր, ԳԱԱ անդամ, պրոֆեսոր Լևոն Զեքիյանը, որն ավելի մոտ է Վատիկանին, ասում է, որ այս ուղղությամբ շատ են աշխատանքները, և Հռոմի պապն ինքը միայն կարող է վերջնական որոշել, քանի որ ունի այդքան իրավասություն:
