«Սիրիայի ազատ բանակ» ընդդիմադիր խմբավորումը մի քանի օր տևող մարտերից հետո գրավել է պաղեստինցիների «Յարմուկ» ճամբարը, որը տեղակայված է Դամասկոսի հարավում: Այս մասին հաղորդում է Reuters գործակալությունը` վկայակոչելով ապստամբների և ճամբարի բնակիչների շրջանում իր աղբյուրներին:
«Ամբողջ ճամբարը գտնվում է «Սիրիայի ազատ բանակի» վերահսկողության ներքո»,- մեջբերում է գործակալությունը աղբյուրներից մեկի բառերը:
Աղբյուրի խոսքերով` այն փախստականները, որոնք աջակցել են Սիրիայի կառավարական զորքերին, փախել են ճամբարից:
Մի քանի օր շարունակ ճամբարում մարտեր էին ընթանում: Հաղորդվել է, որ պաղեստինցի փախստականների մի մասն աջակցում է ապստամբներին, իսկ մյուս մասը` կառավարական զորքերին:
Հիշեցնենք, որ կիրակի Սիրիայի ավիացիան ճամբարի վրա արձակել է առնվազն երկու հրթիռ: Գնդակոծության զոհ է դարձել առնվազն 25 մարդ։