Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ պետք է սկսվեր Արթուր Շահինյանի գործի դատական քննությունը:
Այս գործով չորրորդ դատական նիստն էլ հետաձգվեց, որովհետև ամբաստանյալը ցանկանում է պայմանագրային հիմունքներով պաշտպան ունենալ, բայց չի կարողանում ապահովել պաշտպանի ներկայությունը դատական նիստերին:
Արթուր Շահինյանը այսօր ևս կտրականապես հրաժարվեց օգտվել հանրային պաշտպանի գրասենյակի փաստաբանների ծառայությունից, ասաց, թե ինքը վճարունակ է, ցանկանում է լավ պաշտպան ունենալ, բայց ինչ-ինչ հարցեր չի կարողանում լուծել:
Ամբաստանյալն ասաց, որ պաշտպանին վարձելու հարցը պիտի լուծի իր հայրը, ով գտնվում է Ֆրանսիայում:
Այս շաբաթվա դատական նիստում ամբաստանյալը հերթական անգամ խնդրեց տասնհինգ օրով հետաձգել դատական նիստը, մինչև կկարողնան պայմանավորվածություն ձեռք բերել պաշտպանի հետ:
Ամբաստանյալը հայտարարեց, թե իրեն լրիվ անմեղ է ճանաչում, դրա համար էլ շատ է կարևորում, որ գործի դատական քննությանը իր շահերը պաշտպանող լավ փաստաբան ներգրավվի:
Մեղադրող Դ. Կարապետյանն ասաց, թե ամբաստանյալի իրավունքն է պաշտպան ունենալը, բայց սա այն դեպքն է, երբ ամբաստանյալը չարաշահում է իր այդ իրավունքը, քանի որ չորրորդ նիստն է՝ նա չի կարողանում լուծել պաշտպանի հարցը և միջնորդում է հետաձգել դատը:
Նախագահողի խոսքին, թե «լուրջ պրոբլեմ» է առաջանում, ամբաստանյալը նեղվեց. «Լուրջ պրոբլեմն էն ա, որ ես մի տարի ա բերդում եմ: Ես ինձ լրիվ անմեղ եմ ճանաչում, էս հանցագործությունը ես չեմ կատարել ու մի տարի ա փակված եմ: Իսկ դուք ասում եք, թե երկու-երեք դատական նիստ հետաձգելն ա լուրջ պրոբլեմ: Եթե հնարավոր չի էս նիստը հետաձգել, ոնց գիտեք՝ ընենց էլ արեք»:
Դատական նիստերին ամբաստանյալի ոչ մի հարազատ չի ներկայանում, չնայած ամբաստանյալն ասաց, որ Երևանում հարազատներ ունի: Ամբաստանյալի խոսքից հայտնի դարձավ, որ հայրը Ֆրանսիայում է, մայրը ևս Հայաստանում չէ: Ամբաստանյալը ընտանիք էլ է ունեցել կամ՝ ունի…
25-ամյա Արթուր Շահինյանը մեղադրվում է այն բանի համար, որ 2013 թվականի հուլիսի 13-ին, առավոտյան ժամը 6-ն անց 30-ի սահմաններում ինքնությունը չպարզված անձի կամ անձանց հետ բաց դռնից մուտք է գործել 75-ամյա Անյա Մուսայելյանի տուն և շահադիտական դրդումներով սպանել է նրան:
Ըստ գործի տվյալների՝ Արթուրն ու տուժող կինը նույն թաղամասում են բնակվել՝ Երևանի Էմինեսկուի 2-րդ փողոցում, Արթուրը ճանաչել է տուժողի որդուն, թոռներին: Տղաների հետ ֆուտբոլ է խաղացել…
Դեպքի ժամանակահատվածում տուժող կինը տանը մենակ է եղել, որովհետև որդին ու թոռները մեկնել էին հանգստանալու:
Ամբաստանյալն իմացել է այդ մասին:
Դեպքի օրը տուժողը խեղդամահ է արվել, նրա տնից գողացվել է 2700 դոլար գումար և ոսկեղեն:
Դեպքից անմիջապես հետո Արթուր Շահինյանը մեքենա է գնել: Ինչպես նաև ծանոթներից մեկի հետ ոսկեղեն է գրավադրել: Գրավադրված ոսկեղենը եղել է տուժողի բնակարանից հափշտակված ոսկեղենը:
Արթուր Շահինյանը հայտնաբերվել ու բերման է ենթարկվել Ախթալա քաղաքից 2013 թվականի օգոստոսի 8-ին:
Ինչպես ասաց մեղադրողը՝ նախաքննության սկզբում Արթուր Շահինյանը տվել է խոստովանական երկու ցուցմունք, ինչպես նաև մասնակցել է քննչական փորձարարությանը և տուժողի տանը ցույց է տվել, թե ինչպես է կատարել հանցագործությունը: Նա չի ասել միայն, թե ով է եղել իր հետ, ասել է, թե մենակ է եղել:
Արթուր Շահինյանը մեղադրվում է շահադիտական դրդումներով սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ, 8-րդ կետերով:
