News Georgia-ի փոխանցմամբ՝ Ռուսաստանի հետ հարաբերությունների կարգավորման գծով Վրաստանի վարչապետի հատուկ ներկայացուցիչ Զուրաբ Աբաշիձեն այսօր լրագրողների հետ զրույցում չի բացառել, որ կարող են վերանայվել «Վրաստանի օկուպացված տարածքների մասին» օրենքի մի շարք նորմեր, որոնք մասնավորապես, սահմանափակում են ավելի վաղ ապօրինաբար Աբխազիայի ու Ցխինվալի շրջան (Հարավային Օսիա) այցելած անձանց մուտքը Վրաստան.
«Օրենքն օրենք է, և ես չեմ կարող փոխել այն: Սակայն եթե մենք տեսնենք, որ օրենքի մի մասը խոչընդոտում է դրական քայլեր գործելուն, ապա կարելի էմտածել այդ օրենքի մի շարք տարրերում փոփոխություններ մտցնելու մասին: Դա պետք է որոշի խորհրդարանը: Վերջին շրջանում օկուպացված տարածքների մասին օրենքը խախտածները պատժվել են միայն տուգանքով և ոչ ոք չի ձերբակալվել:
Ռուսաստանի կողմից վիզային ռեժիմի պահպանումն ադեկվատ չէ, քանի որ Վրաստանի նախկին իշխանությունները՝ որպես բարի կամքի նշան, Ռուսաստանի քաղաքացիների համար միակողմանիորեն վերացրել են վիզային ռեժիմը»:
Աբաշիձեն ընդգծել է, որ դեռ չի պլանավորվում Վրաստանի ու Ռուսաստանի վարչապետների միջև հանդիպում:
Հիշեցնենք, որ Վրաստանում «Օկուպացված տարածքների մասին» օրենքը խախտած անձանց պատժում են տուգանքով կամ 2-4 տարի ազատազրկմամբ: