Թուրքական Cumhuriyet թերթի փոխանցմամբ, Թուրքիան, Լիբիայի ծովային շրջափակումից բացի, մասնակցելու է նաև նրա օդային շրջափակմանը:
Այդ նպատակով թուրքական կողմը մտադիր է հատկացնել 6 F-16 և 1 լիցքավորող-ինքնաթիռ: Դրանք կտեղակայվեն Սիցիլիայում գտնվող ՆԱՏՕ-ի Տրապանի բազայում և կվերահսկեն Միջերկրական ծովի լիբիական հատվածում օդային միջանցքները: Ընդհանուր առմամբ, այդ գոտին ունենալու է 800 կիլոմետր երկարություն (Բենղազիից մինչև Տրաբլուս) և 500 կիլոմետր խորություն:
Թուրքական ռազմաօդային ուժերի բարձրաստիճան զինվորականներից մեկը նշել է, որ թուրքական օդուժը կարող է այդ ամենին ձեռնամուխ լինել արդեն առաջիկա 24 ժամվա ընթացքում:
Նշվում է, որ Միջերկրական ծովում պարեկություն կատարող ռազմանավերի օդային պաշտպանությունը դրվելու է թուրքական ռազմաօդային ուժերի վրա, իսկ ռազմանավերի հրամանատարությունն ստանձնելու է Իտալիան: Թուրքական կողմը հայտարարել է, որ չի թողնի անգամ թռչուն երևա
այդ գոտում:
Հիշեցնենք, որ Թուրքիան Լիբիայի ծովային շրջափակման համար էլ հատկացրել է 6 ռազմանավ, 4 ֆրեգատ (Gaziantep, Gemlik, Yıldırım, Yavuz), 1 օժանդակ նավ (Akar) և 1 սուզանավ: Ընդհանուր առմամբ, Լիբիայի ծովային ու օդային շրջափակմանը կմասնակցեն 1000-1200 թուրք զինծառայողներ:
