Ռուսական բանակում հաճախակիացել են ազգային պատկանելության հիման վրա կատարվող հանցագործությունները: Այս մասին Грузия Online գործակալությանը տեղեկացրել է Ռուսաստանի գլխավոր զինվորական դատախազ Սերգեյ Ֆրիդինսկին:
Սակայն ազգային պատկանելության պատճառով բանակի մասնատման մեջ մեղադրվում են այդ երկրի այլազգի կամ այլադավան քաղաքացիները: Երկրում ռուսամոլության կտրուկ աճի մասին ոչ մի խոսք չկա:
«Բանակի համալրման հարցում մոտեցումների փոփոխությունը` որոշ հրամանատարների կողմից թողտվության պայմաններում հանգեցնում է նրան, որ զանազան էթնիկ խմբերի զինծառայողները փորձում են զինվորների մեջ իրենց կարգուկանոնը պարտադրել», Ֆրիդինսկիի խոսքերն է մեջբերում Интерфакс-ը:
Բանակում զինվորների միջև առճակատումը իր ծավալների և հաճախականության առումով այնքան մեծ է, որ բանակի պառակտման հավանականությունը լուրջ խնդիր է դարձել և շտապ միջամտություն է պահանջում: Դատախազի խոսքերով, միայն 2010թ.-ին էթնիկ պատճառներով հանցագործությունների 16 տոկոսից ավել աճ է գրանցվել, իսկ այս տարվա առաջին ամիսներին զորամասերում արձանագրվել է ավելի քան 500 նմանօրինակ հանցագործություն: