«Զոհաբերություն է, և զոհի ընտրությունը թերևս պայմանավորված է նաև ներքին խնդիրներով: Ինչ-որ մեկը պիտի զոհաբերվեր, պատրանք ստեղծելու համար, թե քայլեր են արվում»,- անդրադառնալով ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի նկատմամբ սկսված քրեական գործին, կարծիք հայտնեց իրավապաշտպան, «Հանրապետություն» կուսակցության քաղխորհրդի անդամ Արտակ Զեյնալյանը:
Իրավապաշտպանի գնահատմամբ, Թամամյանի դեմ հարուցված գործի նման գործեր շատ կան և շատ ավելի թարմ, մասնավորապես Վահան Խալաֆյանի սպանությունը, երբ ոստիկանատանը երիտասարդը ծեծելով սպանվել է, և այդ գործը չի բացահայտվում` այն դեպքում, երբ ակնհայտ է, որ դա իրականացրել են ոստիկանության աշխատակիցները և բարձրաստիճան պաշտոնյաները, իհարկե` ոչ գեներալի կոչում ունեցողը:
«Ընտրողաբար մեկին պատժելը խոսում է այն մասին, որ դա ցուցադրական է և միայն շղարշ է»,- եզրափակեց Զեյնալյանը: