«Հեռուստամարաթոն 2014-ի դրամահավաքը կուղղվի Վարդենիս- Մարտակերտ ավտոճանապարհի ամբողջական կառուցմանը: Ճանապարհի ընդհանուր երկարությունը 116կմ է, որից մոտ 14կմ-ի գումարը տրամադրել է ՀՀ կառավարությունը: Այսինքն, խոսքը մնացած 102 կմ-ի մասին է»,- «Առաջին լրատվականի» հետ զրույցում ասաց «Հայաստան» համահայկական հիմնադրամի գործադիր տնօրեն Արա Վարդանյանը՝ հավելելով, որ նախանցած տարի հիմնադրամը իր հոգաբարձուների խորհրդի նիստի ընթացքում հաստատեց Վարդենիս-Մարտակերտ ավտոճանապարհը՝ որպես հիմնադրամի դրամահավաքի գլխավոր թեմա։
«Հենց այդ ժամանակ էլ ես վստահ էի, որ 1 տարում դժվար կլինի հավաքագրել ամբողջ գումարը ճանապարհի համար, քանի որ արժեքը տատանվում է 30-33 մլն ամերիկյան դոլարի սահմաններում: Առաջին դրամահավաքից հետո մենք հասկացանք, որ մյուս տարվա մեր ուղղվածությունը նորից պետք է լինի այս ճանապարհի կառուցումը, որպեսզի կարողանանք հավաքել մնացյալ գումարը և ծրագիրը ավարտին հասցնենք,- ասաց նա՝ հավելելով, թե այս պահի դրությամբ կարող է հայտնել, որ մինչև տարեվերջ կիրականանցվեն բոլոր հողային աշխատանքները ճանապարհի ամբողջ երկարությամբ,- իսկ Հայաստանի մասում, պետք է նշեմ, որ Հայաստանի մասի աշխատանքները ֆինանսավորել է ՀՀ կառավարությունը՝ տրամադրելով համահայկական հիմնադրամին 1 մլրդ 600 մլն դրամ, և այդ գումարը ուղղվել է 14կմ երկարությամբ Հայաստանի մասի վրա, այդ ճանապարհի 90%-ը կասֆալտապատվի, իսկ մնացածը կթողնենք հաջորդ տարվան: Մնացած աշխատանքները, մասնավորապես ասֆալտապատումը, կսկսվեն հաջորդ տարի, հենց որ եղանակները թույլ տան, շինարարները կսկսեն: Ինչ վերաբերում է ուղղվածությանը, նշեցի, որ դա կլինի Վարդենիս-Մարտակերտ ճանապարհի կառուցումը»:
Ըստ Արա Վարդանյանի՝ հեռուստամարաթոնի նախապատրաստական աշխատանքներն սկսում են նախորդ հեռուստամարաթոնի ավարտից մեկ օր անց: Քանի որ թարմ են բոլոր այն խնդիրները, որոնք տեսնում ես: Դրա համար մենք միշտ Միացյալ Նահանգներում հեռուստամարաթոնից հետո իրականացնում ենք մեծ ժողով, որի ընթացքում քննարկում ենք բոլոր բացթողնումները և, դրանք հաշվի առնելով, արդեն որոշումներ ենք կայացնում՝ եկող հեռուստամարաթոնում ինչ պետք է փոխվի, ինչ պետք է լինի։ «Նշեմ, որ իր ձևով հեռուստամարաթոնը չի կարող տարբերվել թե նախորդ մարաթոնից, թե 10 տարի առաջ եղած մարաթոնից, որովհետև ինքը՝ որպես դրամահավաքի ձև, այդ է: Հեռուստամարաթոն է, որի ժամանակ ցուցադրում ես նյութեր, որի ժամանակ լինում են վարողներ, ովքեր կոչ են անում ժողովրդին, որպեսզի մասնակցեն դրամահավաքին»,- մանրամասնեց Արա Վարդանյանը՝ ընդգծելով, որ ձևի մեջ որքան հնարավոր է փոփոխություններ մտցնել՝ փոփոխում են:
Արա Վարդանյանը նաև մանրամասնեց, որ հեռուստամարաթոնի ժամանակ այլ նվիրատվություններ ևս լինում են ՝ դա հատուկ ծրագրերի համար նվիրատվություններ են, որոնց շնորհիվ շարունակում են բոլոր բնագավառներում աշխատանքը՝ դպրոցաշինություն, համայնքային կենտրոններ, սահմանամերձ գյուղերում գյուղատնտեսական ծրագրեր: «Այսինքն՝ մենք ոչ միայն ճանապարհ ենք կառուցելու, այլև շարունակելու ենք բոլոր ոլորտներում մեր գործունեությունը: Որպես օրինակ կարող ենք բերել Աշոցքի դպրոցը, որի բացումը շուտով տեղի կունենա: Դա հենց հատուկ ծրագիր է, որ հեռուստամարաթոնի ժամանակ բարերարի կողմից հայտարարվել է, բայց գումարը ուղղվել է ոչ թե այդ տարվա մարաթոնի գլխավոր թեմային, այլ հենց այդ մարդու նախընտրած ծրագրին: Եվ նման ծրագրերը շատ-շատ են»,- ասաց նա:
Այս պահին Տավուշի մարզում շատ լուրջ ծրագրեր են ծավալվում՝ գրեթե 1 մլն եվրո Տավուշի գյուղատնտեսական ծրագրերին է ուղղվում։ «Այդ ծրագիրը համաֆինանսավորվում է Ֆրանսիայի Օդեսեն նահանգի կողմից, ինչպես գիտեք՝ մեր հայրենակից Պատրիկ Դևեճյանն է այնտեղ: Եվ յուրաքանչյուր տարի այդ նահանգը տրամադրում է 500 հազար եվրո այստեղ գյուղատնտեսական ծրագրի զարգացման համար»,- եզրափակեց բանախոսը:
Հարցազրույցն ամբողջությամբ՝ տեսանյութում։