Oգոստոսի 28-ին, ժամը 18:00-ի սահմաններում, ականի պայթյունի հետևանքով տարբեր աստիճանի մարմնական վնասվածքներ են ստացել պայմանագրային գումարտակի հրամանատար, փոխգնդապետ Լեռնիկ Բաբայանը, կապիտան Վահագն Սարգսյանը, լեյտենանտ Հովհաննես Կոթինյանը, պայմանագրային զինծառայող, շարքային Անդրանիկ Բաբայանը:
«Առաջին լրատվական»-ն այցելել է Մուրացանի անվան հոսպիտալ, ծանոթացել վիրավորների առողջական վիճակին:
Վեց երեխաների հայր՝ փոխգնդապետ Լեռնիկ Բաբայանը թեև ականի պայթյունի հետևանքով կորցրել է աջ սրունքի մեկ երրորդը, բայց գիտի՝ հանուն ինչի է կորցրել՝ հանուն հայրենիքի…
«Թեև ադրբեջանական բանակն իր ամբողջ կարողությունն էր նետել սահմանի ուղղությամբ, իսկ մեզ մոտ մեր զինվորներն էին, ովքեր իրենց ծառայությունն էին կատարում, սակայն նրանք դիմակայեցին, նույնիսկ մի քանի անգամ ավելի հակահարված տվեցին»,- հպարտորեն նշեց փոխգնդապետը՝ հավելելով, որ որքան բանակը պատրաստված է և մարտունակ, այնքան մեր շահերից է բխում:
Նրա խոսքով՝ սահմանին լարվածության ժամանակ ինքը դիրքերից չի իջել, մնացել է անձնակազմի հետ, միջդիրքային հատվածներում, որտեղ կար հակառակորդի դիվերսիոն հետախուզական խմբերի ներթափանցման վտանգ:
«Հիմա կարող եք բժշկին կանչել, ես տասը օրից գնալու եմ դիրքեր, ես պետք է գնամ, այստեղ չեմ մնալու, մեծ անելիքներ ունեմ, մեծ, ավելի շատ, զայրացած, պարտքեր ունենք, չէ՞, վերցնելու»,-ծիծաղով նշեց փոխգնդապետը:
Լեռնիկ Բաբայանը ընտանիքի հետ բնակվում է Շամշադինում, կինն էլ իր հետ է աշխատում՝ բանակում, վեց երեխաներին նույն ոգով է դաստիարակում: Նրա խոսքով՝ աղջիկ թե տղա, զինվորը մնում է զինվոր, և բոլորը պարտավոր են մեր սուրբ հայրենիքի համար իրենց ներդրումն ունենալ:
Փոխգնդապետի կարծիքով՝ որևէ մեկը չպետք է խուսափի ծառայությունից. «Սովետական Միության ժամանակ ծառայել եմ սովետական բանակում, կար այսպիսի ավանդույթ՝ տղան գնում էր աղջիկ ուզելու, հարցնում էին՝ բանակում ծառայե՞լ ես, եթե ասում էր՝ հա, աղջիկ տալիս էին, ասում էր՝ չէ, պատասխանում էին՝ քեզ աղջիկ չունենք տալու»,- ասաց նա՝ ցանկանալով, որ հիմա էլ վերականգնվի այդ ավանդույթը, քանի որ, իր իսկ խոսքով, բանակում ծառայությունը սուրբ գործ է:
Լեռնիկ Բաբայանի կինը՝ Գայանե Բաբայանը, հպարտ է, որ հերոս ամուսին ունի: «Զինվորներին ասում է՝ դուխներդ չգցեք, տասը օրից ձեզ հետ եմ»,-ասաց կինը՝ հավելելով, որ ամուսիններով մյուս շաբաթվանից կանցնեն ծառայության:
«Ցանկացած մարդ պետք է կարողանա վախը հաղթահարել իր մեջ»,- հավելեց փոխգնդապետը:
Ավելին՝ տեսանյութում: