Ինչպես հայտնի է՝ նախաքննական մարմինը տևական ժամանակ «Բուդաղյանների գործով» գործի նյութերի մեծ մասը չէր տրամադրում կողմին, մասնավորապես՝ գործով փաստաբան Հայկ Ալումյանին: Սակայն դատաքննության փուլում փաստաբանին վերջապես հաջողվել է պատճենել գործի նյութերը, որտեղ, նրա խոսքով, կան նյութեր, որոնք ակնհայտորեն հաստատում են Սուրիկ Խաչատրյանի, նրա որդու և Զազանդ Նիկողոսյանի մեղքն այդ օրը տեղի ունեցած իրադարձությունների մեջ:
Բանն այն է, որ Սուրիկ Խաչատրյանի առանձնատան տեսախցիկներից մեկը տեսանկարահանելուց բացի նաև ձայնագրել է, որի մասին Սուրիկ Խաչատրյանի ընտանիքի անդամները չեն իմացել: Նրանք չեն իմացել, որ իրենց խոսակցությունը ձայնագրվում է: Ամեն դեպքում, փորձաքննությունը վերծանել է այդ խոսակցությունները, որոնք բաժանվում են երեք մասի՝ դեպքից առաջ, դեպքի ընթացքում և դեպքից հետո:
Հայկ Ալումյանն այսօր լրագրողների հետ հանդիպման ժամանակ ներկայացրեց խոսակցության որոշ մանրամասներ, որոնցից պարզ է դառնում, որ մինչև կրակոցները, մեքենայի մեջ, հենց Սուրիկ Խաչատրյանն է ծեծի ենթարկել Ավետիք Բուդաղյանին: «Դա պարզ երևում է խոսակցությունից: Զարզանդ Նիկողոսյանը դեպից հետո Խաչատրյանենց տանը պատմում է՝ «էդ Ավոյին հավայի տեղը խփին-մփին ու ավտոյից իջացրին»: Դա փաստում է, որ Զարզանդը մասնակից չի եղել, և մնում են միայն Սուրիկ Խաչատրյանն ու վարորդը»,- ասաց Ալումյանը՝ հավելելով, որ ըստ ձայնագրության խոսակցության՝ մեքենայի մեջ Սուրիկ Խաչատրյանը չի էլ ճանաչել Ավետիք Բուդաղյանին, քանի որ հարբած է եղել, շրջվել հարցրել է, թե ով է իր կողքը նստած: Ասել են, որ Ավոն է: Խաչատրյանն էլ ասել է՝ հանեք ռադ արեք:
«Եվ այսքանից հետո Զարզանդը ցուցմունք է տալիս և ասում է, որ ինքն է մեքենայի մեջ ծեծել Բուդաղյանին»,- նկատեց Ալումյանը:
Այնուհետև դեպքի բուն ընթացքում, կրակոցների ժամանակ, կանանց բղավոցներից ակնհայտ է դառնում, թե ով է կրակողը, իսկ վերջում՝ դեպքից հետո, նրանց խոսակցություններից պարզ է դառնում, որ զենքներն անօրինական են եղել, իսկ Զարզանդ Նիկողոսյաննն առաջարկել է կտրել զենքերը, որպեսզի դրանք հրազեն չհամարվեն:
Ուշագրավ է, որ նախաքննական մարմինը ձայնագրության մեջ հնչած ոչ մի դրվագի, փաստի առնչությամբ քննություն չի կատարել և ուշադրության չի արժանացրել:
Մանրամասները՝ տեսանյութում:
