Պաշտոնական Ստեփանակերտը դրական է գնահատում երեկ Ուելսում մեկնարկած ՆԱՏՕ-ի գագաթնաժողովի շրջանակներում տեղի ունեցած Սարգսյան-Ալիև հանդիպումը, որն անցել է ԱՄՆ պետքարտուղար Ջոն Քերիի գլխավորությամբ:
ԼՂՀ նախագահ Բակո Սահակյանի մամլո խոսնակ Դավիթ Բաբայանը «Առաջին լրատվական»-ի հետ զրույցում ասաց, որ հանդիպումը շատ կարևոր է, բայց այն չպետք է դիտարկել որպես մի հանդիպում, որի ժամանակ բոլոր հարցերը կլուծվեն: «Այդ հանդիպման բովանդակությունն ու իմաստը վերջնական կարգավորումը չեն»,- ընդգծեց նա:
Միևնույն ժամանակ Բաբայանն ասաց, որ կարգավորման համար կա երեք կարևոր շեշտադրում. «Երեկ ԱՄՆ-ը, ինչպես նախկինում՝ Ռուսաստանը, շեշտեց, որ չի տեսնում հակամարտության կարգավորման ուժային տարբերակ: Այսինքն՝ խաղաղ կարգավորմանն այլընտրանք չկա, սա բանակցային գործընթացի հիմքն է:
Երկրորդ՝ պաշտոնական Ստեփանակերտը պետք է դառնա բանակցային կողմ, և երրորդ՝ անցյալին վերադարձ չկա: Ադրբեջանը դա պետք է քաջ գիտակցի:
Այս երեքը այն հիմնական մասերն են, որ թույլ կտան կարգավորել հակամարտությունը»: