ԼՂՀ անկախության տոնից հետո մի քանի ուշագրավ լուսանկարներ հրապարակվեցին ԶԼՄ-ներում, որոնք չէին կարող ուշադրության չարժանանալ: Համենայնդեպս, դրանցից մեկը շատ ուշագրավ է, որտեղ Սերժ Սարգսյանն է, ԼՂՀ նախագահ Բակո Սահակյանը, ՀՖՖ նախագահ Ռուբեն Հայրապետյանը (Նեմեց), ԱԺ պատգամավորներ Սամվել Աեքսանյանը (Լֆիկ), Առաքել Մովսիսյանը (Շմայս), բազմաթիվ զինվորականներ, իսկ Սերժ Սարգսյանից մի քանի մետր այն կողմ կանգնած է Սամվել Ալեքսանյանի մտերիմ և հովանավորյալ Ռուբեն Սիմոնյանը, որը հանրությանը և քրեական շրջանակներում առավել հայտնի է «Բոգո» անունով կամ «Լֆիկի Բոգո»:
Լուսանկարը շատերը գուցե ուշադրության չեն արժանացնում ոչ թե այն պատճառով, որ դա արտառոց լուսանկար չէ, այլ որ մեր արտառոց իրականության մեջ դա սովորական երևույթ է արդեն: Ուշագրավ է, որ արդեն նախագահների կողքին կարող են կանգնել ոչ միայն քրեական հեղինակություններ, որոնք հանգամանքների բերումով դարձել են պատգամավորներ և հիմա կանգնում են նրա կողքին, այլ դեռևս պատգամավոր չդարձած, դեռևս անմանդատ քրեական հեղինակություն, որը, միայն մամուլի հրապարակումների համաձայն, տասնյակ քրեական պատմությունների հեղինակ է:
Բոգոն է կարգավորում Սամվել Ալեքսանյանի խնդիրները քրեական աշխարհում, զենքի գործադրմամբ լուծում այս կամ այն անձանց հետ ծագած վեճերը, երբեմն էլ պարապ ժամանակ զվարճացնում է Սամվել Ալեքսանյանին:
Բոգոն տիրանալով Ավտոկայանի ամբողջ տարածքին և թիկունքում ունենալով Ալեքսանյանի հովանավորությունը` մինչ օրս ճնշում է Ավտոկայանում տաքսիների վարորդներին, որոնք ապահովում են Երևան-Մարտունի, Երևան-Ստեփանակերտ և այլ երթուղիներ: Բոգոն ստիպում է տաքսու վարորդներին յուրաքանչյուր ուղևորափոխադրումից որոշակի գումար մուծվել իրեն: Իսկ վարորդները չեն կարող չտալ, քանի որ այդ դեպքում հարցն արդեն լուծվում է բոլորովին այլ հարթության մեջ:
Ըստ մամուլի հրապարակումների` հենց նույն Բոգոն էր կազմակերպել 2010 թվականին Էրեբունի համայնքում հնչած կրակոցները: Բոգոն և Սամվել Ալեքսանյանի 30 այլ կողմնակիցներ Էրեբունի համայնքի Ռոստովյան-Աթոյան խաչմերուկում իջել էին իրենց մեքենաներից, կրակ բացել նախկինում դատապարտված մի անձի վրա, ում հետ չլուծված ինչ-ինչ հարցեր էին ունեցել:
Բոգոյի մասնակցությամբ էր անցած տարի ակումբներից մեկում ծեծկռտուք եղել, որն ավարտվել էր կրակոցներով, բազմաթիվ անձանց պատճառված մարմնական վնասվածքներով, հարուցված քրեական գործով, որն այդպես էլ, ինչպես և սպասվում էր, անհետևանք մնաց:
Կրկին մամուլի հրապարակումների համաձայն` Բոգոն իր քրեական վարքուբարքով փայլել էր նաև Գերմանիայում, որտեղ ինչ-որ անձի սպանության համար նրա նկատմամբ հետախուզում էր հայտարարվել: Այդ դեպքից հետո նա հանրապետությունից դուրս է գալիս որպես այլ անձ, այլ անուն-ազգանունով: Իսկ թե ինչպես է դա նրան հաջողվում, մնում է միայն ենթադրել:
Բոգոն էր, որ անցած տարի` «Փակ շուկայի» շուրջ տեղի ունեցող զարգացումների ժամանակ 24 ժամ հսկում էր «Փակ շուկան» սուպերմարկետի վերածելու դեմ պայքարի ակտիվիստներին, ոստիկանների ներկայությամբ բացահայտ, անարգել կերպով իր «յաշիկը» քշում էր մայթերով, մարդկանց միջով, և որևէ մեկը նրան չէր խոչընդոտում: Ավելի կոնկրետ` անգամ ոստիկանները չէին համարձակվում նրան որևէ պահանջ ներկայացնել կամ գոնե կարգի հրավիրել:
Այս շարքը շարունակական է, քանի որ ինչքան որ այդ քրեական անձի «հերոսությունները» հայտնի են դարձել հանրությանը, հարյուրավոր նման դեպքեր էլ գաղտնի են պահվել: Եվ այդքանից հետո թույլ տալ, որ այդ անձը կանգնել երկու երկրների նախագահների կողքին` թեկուզ միայն արարողակարգի առումով անթույլատրելի է: Էլ չասած մնացած հանգամանքները:
Չնայած Հայաստանում ամեն ինչ աստիճանաբար օրինաչափ է դառնում, անգամ Բոգոյի պես անձանց առաջին շարքեր մղելը, քանի որ առաջին շարքերում գտնվողները ևս ոչնչով չեն զիջում Բոգոյին: Պարզապես, ի տարբերություն Բոգոյի, նույնն անում են ավելի քաղաքակիրթ ճանապարհով:
Լուսանկարը՝ Civilnet.am-ի