Վրաստանի փոխվարչապետ, եվրոպական ու եվրատլանտյան ինտեգրման հարցերի նախարար Գեորգի Բարանիձեն, երեկ երեկոյան ՆԱՏՕ-ի սեմինարում հայտարարել է, թե «Վրաստանը ԱՄՆ ներկայացուցիչը չէ Եվրոպայում»: Այս մասին հաղորդում է “Новости-Грузия” կայքը:
«Մենք նպատակաուղղված չենք դեպի ԱՄՆ: Մենք եվրոպական արեւելք ենք եւ մտադիր չենք Ամերիկայի ներկայացուցչությունը լինել Եվրոպայում», ասել է Բարամիձեն` պատասխանելով սեմինարում Նիդեռլանդների Թագավորության ներկայացուցչի հարցին:
Նիդեռլանդների ներկայացուցիչը մասնավորապես ասել է. «Չեմ հասկանում, ինչու է Վրաստանը ձգտում նախ ընդգրկվել ՆԱՏՕ, նամանավանդ, որ այն հնարավոր չի լինի իրագործել դեռ առնվազն 10 տարի: Հավանական է, որ Եվրամիություն ընդգրկվելն էլ նույնքան ժամանակ պահանջի: Սակայն ԵՄ-ի հետ մերձեցումն ավելի իրական է զանազան ծրագրերի միջոցով: Հասկանում եմ, որ դրա պատճառն այն է, որ Վրաստանը ավելի շատ նպատակաուղղված է դեպի ԱՄՆ, սակայն ավելի տրամաբանական կլիներ ԵՄ-ին անդամակցելը»:
Բարամիձեն իր հերթին նշել է, թե Վրաստանը 3 հազարամյա պատմություն, սեփական այբուբեն ունի եւ ժողովրդավարական բարեփոխումներ է իրականացնում ԵՄ անդամագրվելու համար:
«Մենք վաղուց ենք հայտարարել, որ վրացի ենք եւ ուրեմն եվրոպացի ենք: ԵՄ-ին անդամակցելը մեզ համար բավական հեշտ գործընթաց է: Մեր նպատակը նախ ՆԱՏՕ-ին անդամակցելն է: Եվ հույս ունեմ, որ ՆԱՏՕ-ի հաջորդ գագաթնաժողովին Հյուսիսաըլանտյան դաշինքը կարձանագրի, որ Վրաստանը դառնալու է Դաշինքի անդամ»: Անդամակցությունից հետո Ռուսաստանը կհասկանա, որ ՆԱՏՕ-ի անդամ դառնալով` Վրաստանը վտանգ չի ներկայացնում իր համար: Լավրովը հայտարարել էր, թե «ՆԱՏՕ-ն սպառնալիք չէ Ռուսաստանի համար, իսկ դրա ընդլայնումը սպառնալիք է»: Այս պահվածքը մանկական խաղ է: Եթե Եվրոպան ճանաչեր ու դատապարտեր Աբխազիայի ու Հարավային Օսիայի գրավումը եւ այնտեղ էթնիկ զտումները, դա կստիպեր Ռուսաստանին` երկու անգամ մտածել իր քաղաքականությունը շարունակելուց առաջ: Գրավված տարածքները Ռուսաստանի համար ոչինչ են, իսկ մեզ համար մեր տարածքի 20 տոկոսն են»,- հայտարարել է Բարամիձեն:
Նա նաեւ ավելացրել է, թե նույնիսկ 2008 թ. պատերազմի ընթացքում Վրաստանը չի դադարեցրել էլեկտրաէներգիայի արտահանումը, իսկ վրացիները ռուսաֆոբիայով չեն տառապում:
