«Քոչարյանի տասնամյակը զրոյական է Հայաստանի համար, դա կորսված տասնամյակ է»,- «Առաջին լրատվական»-ի հետ զրույցում ասաց «Նախախորհրդարանի» անդամ Տիգրան Խզմալյանը՝ հավելելով, որ բոլոր իմաստներով որևէ ոլորտում ձեռքբերումներ չեն եղել:
«Մենք կանգնած էինք, նահանջում էինք, երբ ամբողջ աշխարհը առաջ էր գնում»,- ասաց նա:
Խզմալյանի խոսքով՝ 99 թվականից սկսած, հատկապես Հոկտեմբերի 27-ից հետո, արձանագրվեց Հայաստանի անկախ պետականության ավարտը:
Մեր զրուցակիցը նկատեց, որ բոլորովին անհրաժեշտ չէ լինել Վազգեն Սարգսյանի, Կարեն Դեմիրճյանի հետնորդը՝ հասկանալու համար, թե իրականում ինչ կատարվեց Հայաստանում. 99թ.-ին կատարվեց դժվար բալանս իշխանությունների տարբեր թևերի միջև. «Գործադիր և օրենսդիր իշխանությունները գտնվում էին լարված համագործակցության մեջ, և դա մեզ հույս էր տալիս զարգանալու, կառուցելու պետականություն, իսկ այն, ինչ կատարվեց, պետք չէ դիտարկել միայն Հայաստանի շրջանակներում, պետք է դիտարկել ավելի լայն կոնտեքստում: Այդ տարվա աշնանը սկսվեց իրականացվել Խորհրդային Միության վերականգնման փորձը, և Հայաստանը եղավ այդ գործընթացի կարևոր օղակը: Ամեն ինչ սկսվեց այն բանից հետո, երբ ՌԴ-ում իշխանության եկան հատուկ ծառայությունները՝ հանձին Պուտինի՝ որպես կառավարության ղեկավարի, ով ամռանը եկավ իշխանության, և անմիջապես տեղի ունեցան ողբերգական իրադարձություններ: Սեպտեմբերին չեչենական պատերազմը հասավ իր գագաթնակետին, սեպտեմբերի վերջին Մոսկվայում և այլ քաղաքներում սկսեցին կասկածելի հանգամանքներում պայթել շենքեր, արդեն Հոկտեմբերի 27-ին Հայաստանի խորհրդարանում տեղի ունեցավ սարսափելի ողբերգությունը, իսկ դեկտեմբերին Ելցինը հրաժարական տվեց»:
Ըստ Խզմալյանի՝ եթե նախկինում շատերը չէին հասկանում, ապա տարիներ անց արդեն պարզ դարձավ, որ այս բոլոր իրադարձությունները շղթայված էին, և Քոչարյանն իր դերն ուներ, արդեն ընտրել էր ոչ ազգային, ոչ պետականամետ ուղի՝ «Սիստեմա» կոչվող համակարգում. «Իզուր չէ, որ հիմա է խոսվում Քոչարյանի վերադարձի մասին՝ այն ժամանակահատվածում, երբ տեղի է ունենում Խորհրդային Միության վերականգնման երկրորդ արյունալի փուլը, Քոչարյանը սպասում էր իր ժամին»,- նկատեց նա:
Տիգրան Խզմալյանը նաև ասաց՝ Քոչարյանը արյունով եկավ, արյունով գնաց, վերադարձը ևս լինելու է արյունալի, իսկ որպես օրինակ կարող ենք դիտարկել Ուկրաինայի դեպքերը: Ըստ նրա՝ Քոչարյանն արդեն իսկ իր վերաբերմունքը հանրության նկատմամբ ցույց է տվել «բեսպրեդել» քայլերով:
Առավել մանրամասն՝ տեսանյութում: