Ղազախստանը երբեք Հայաստանի ԵՏՄ անդամակցության դեմ ձայն չի բարձրացրել, բայց Ղազախստանը Ղարաբաղի հարցում վերապահումներ ունի, և այդ հարցը փակված կլինի, եթե Հայաստանը որոշի միանալ ԵՏՄ-ին այնպես, ինչպես ԱՀԿ-ին: «Առաջին լրատվական»-ի հետ զրույցում այս մասին ասաց ղազախստանցի փորձագետ Վասիլի Միսնիկը՝ անդրադառնալով Հայաստանի եվրասիական ինտեգրացիայի վերաբերյալ ղազախական վերապահումներին և Հայաստանի անդամակցության ընդունելի ձևաչափերին:
Նա հիշեցրեց, որ Ղազախստանի նախագահ Նուրսուլթան Նազարբաևը Սերժ Սարգսյանին ասաց, որ Հայաստանը պետք է միանա ԵՏՄ-ին այնպես, ինչպես միացել է ԱՀԿ-ին, այսինքն՝ ՄԱԿ-ի կողմից ճանաչված սահմաններով: Նա ակնարկեց, որ Ղազախստանը մաքսակետի հարց չի բարձրացնի:
«Կարծում եմ, որ հենց այս դիրքորոշումը Ղազախստանին թույլ է տալիս Լեռնային Ղարաբաղի հարցը փակված համարել և երրորդ երկրներից, մասնավորապես՝ Ադրբեջանից, չընդունել այս հարցի առնչությամբ բողոքներ ու պահանջներ: Այս հարցի առնչությամբ Ադրբեջանն ու Ղազախստանը համատեղ դիրքորոշում չունեն, քանի որ Ադրբեջանը որևէ լավ բան չի տեսնում Հայաստանի ԵՏՄ անդամակցությունից, իսկ Ղազախստանը դրան դեմ չէ: Թեև, անկասկած, Ղազախստանն ու Բելառուսը նախընտրեցին պահպանել այդ միության հիմնադիրների իրենց իրավունքը և հիմնեցին այդ միությունը երեք երկրներով, ես կարծում եմ, որ հենց այս պատճառով էր, որ Հայաստանը չմիացավ ԵՏՄ-ին և ՄՄ-ին հենց այս փուլում»,- մեկնաբանեց ղազախստանցի փորձագետը:
Հիշեցնենք, որ Ղազախստանի արտգործնախարար Եռլան Իդրիսովը հայտարարել էր, որ հնարավոր է՝ Հայաստանը Եվրասիական տնտեսական միությանը միանալու մասին համաձայնագիրը ստորագրի հոկտեմբերին:
«Փաստաթղթերի ստորագրումը, ամենայն հավանականությամբ, տեղի կունենա հոկտեմբերին Մոսկվայում՝ Եվրասիական տնտեսական միության անդամ պետությունների ղեկավարների գագաթնաժողովին»,- ասել էր Իդրիսովը:
Ավելի վաղ Ռուսաստանի նախագահ Վլադիմիր Պուտինը հույս էր հայտնել, որ «Հայաստանը ամենամոտ ապագայում կդառնա Եվրասիական տնտեսական միության լիարժեք անդամ»: