Հայաստանի հավաքականի բոլոր ֆուտբոլիստները պատրաստ են մարտի 26-ին կայանալիք Ռուսաստանի հավաքականի հետ խաղին: Այս մասին այսօր «Հանրապետական» մարզադաշտի մամուլի սրահում ասաց Հայաստանի հավաքականի գլխավոր մարզիչ Վարդան Մինասյանը:
«Նախապատրաստական փուլը սկսեցինք մարտի 22-ին: Հրավիրել էինք 22 ֆուտբոլիստի, սակայն վերջին պահին «Բանանց» ակումբից գրություն ստացանք, որ Արարատ Առաքելյանը վնասվածք է ստացել, և այժմ պատրաստվում ենք 21 հոգով: Այս պահին ամբողջ կազմը պատրաստ է, ոչ ոք վնասվածք չունի: Նույնը կարող եմ ասել նաև հոգեբանական առումով: Թիմը պատրաստ է վաղվա խաղին»:
Մինասյանը կազմի հետ կապված ոչ մի գաղտնիք չբացահայտեց, պարզապես նշեց, որ արդեն որոշված են հիմնական կազմի 10 խաղացողները, և միայն մի դիրքի համար առայժմ որոշում կայացված չէ:
Անդրադառնալով ռուս լրագրողի հարցին՝ համաձա՞յն եք, որ Ռուսաստանը խաղի ֆավորիտն է, նա պատասխանեց. «Մի կողմից դա ձեռնտու է, բայց ես այդպես չեմ կարծում: Եթե այդպես են համարում, ապա մեզ համար դա լավ է»: