Ալեքսանդր Պուշկինի անվան թիվ 8 հիմնական դպրոցն այսօր իր դռներն էր բացել 243 առաջին դասարանցու առաջ: Դպրոցում 7 առաջին դասարան կա այս տարի: Դպրոցի տնօրեն Նատալյա Ստեփանյանն ուրախությամբ փաստեց, որ ավելացել են ոուսական դասարաններն ու երեխաների թիվը՝ դա պայմանավորելով Ուկրաինայում տեղի ունեցող իրադարձություններով:
«Հուրախություն մեզ՝ շատերն են վերադառնում հայրենիք: Ուկրաինայից շատ երեխաներ ունենք: Այս տարի մենք այդ հոսքը զգացինք: Բայց հուսով ենք, որ հակամարտությունը կխաղաղվի, և նրանք կվերադառնան իրենց տուն»,- «Առաջին լրատվական»-ի հետ զրույցում ասաց տնօրենը:
Տնօրենը համակարծիք չէ, թե Պուշկինի անվան դպրոցը կոռումպացված է և հարուստների երեխաների համար է: «Ես կասեի՝ Պուշկինի դպրոցը հայտնի է որպես ավանդական դպրոց: Այսօրվա մեր 243 երեխաների 80 տոկոսը մեր շրջանավարտների երեխաներն են: Եվ ես բարձր եմ գնահատում նրանց վստահությունը ու համոզված եմ, որ մենք կարդարացնենք այդ վստահությունը:
Ինչ վերաբերում է դասագրքերի հետ կապված խնդիրներին, տնօրենը նշեց, որ հայերեն դասագրքերի մասով ամեն ինչ կարգին է, միայն ռուսական բաժնի երեխաների համար որոշակի դժվարություններ կան: Որոշ դասագրքեր ռուսերենով թարգմանված չեն, և ռուսական դասարանների երեխաները ուսուցումը ստանում են ռուսերենով, բայց հայկական դասագրքերով:
Դպրոցում համազգեստի պահանջ չկա, բայց սև ու սպիտակը, մուգ կապույտը պարտադիր է բոլորի համար: Զարդերն ու ավելորդ զարդարանքներն արգելված են:
Իրենց երեխաներին առաջին անգամ Պուշկինի անվան դպրոց բերած ծնողները դպրոցի ընտրությունը բացատրում էին հատկապես համբավով: Ծնողներից մեկը «Առաջին լրատվական»-ի հետ զրույցում նշեց, որ Պուշկինի դպրոցն են ընտրել հատկապես նրա համար, որ «դպրոցի համբավը մեծ է»: «Դեռ նոր ենք եկել, չգիտեմ՝ հարուստների դպրոց ա թե աղքատների, բայց մենք որպես հարուստ չենք եկել էստեղ: Մենք եկել ենք որպես լավ դպրոց»,- ասաց նա:
Պուշկինցի առաջին դասարանցիների մուտքը նոր կյանք ողջունեց Երևանի քաղաքապետի տեղակալ Կամո Արեյանը: