Ա․Պ. Չեխովի անվան թիվ 55 դպրոցն այս տարի 8 առաջին դասարան ունի:
Աշակերտների համար առաջին զանգն այսօր հնչեց 10:00-ին: Նրանցից ոմանք ուրախ էին դպրոց գալու համար, ոմանց աչքերին էլ արցունքներ էին նկատվում:
Դպրոցի տնօրեն Գայանե Սարուխանյանը «Առաջին լրատվական»-ի հետ զրույցում ասաց, որ 8 դասարաններից երկուսը ռուսերենով ուսուցման դասարաններ են․ «Նրանք սովորում են առանձին ծրագրով և մասամբ իրականացնում են Ռուսաստանի Դաշնության կրթական ծրագիրը: Կրթությունը սկսում են ռուսերենով, բայց առաջին դասարանից ուսումնասիրում են մայրենին, ավելի բարձր դասարաններում՝ Հայոց պատմություն, եկեղեցու պատմություն և մի շարք այլ առարկաներ մայրենի լեզվով»:
Տնօրենն ընդգծեց, որ յուրաքանչյուր դասարանում կա մոտ 30 աշակերտ, մի քանիսը կուշանան՝ դեռ չեն հասցրել լինել Հայաստանում:
Տիկին Սարուխանյանը համաձայն չէ այն կարծիքներին, թե Չեխովի անվան դպրոց դժվար է ընդունվել և ավարտել: Նրա խոսքով՝ պարզապես դպրոցն անսահմանափակ տեղեր չունի. շատերն են դիմել, բայց միայն այդքանին են կարողացել ընդունել:
Երևանի քաղաքապետ Տարոն Մարգարյանի շնորհավորական ուղերձն էր Չեխովի անվան դպրոց բերել հենց այդ դպրոցցի շրջանավարտ, Երևանի ավագանու ֆինանսաբյուջետային հանձնաժողովի նախագահ Նաիրա Նահապետյանը:
«Առաջին լրատվական»-ի հետ զրույցում տիկին Նահապետյանն ասաց, որ իր երեխաները ևս ավարտել են այս դպրոցը, բացի դրանից՝ այս դպրոցը տևական ավանդույթներ ունի: «Պետք է այստեղ լավ սովորել, այս դպրոցի պահանջներն իսկապես խիստ են»,- ասաց նա:
Առավել մանրամասն՝ մեր տեսանյութում:
