Էրդողանից կարելի է անակնկալներ սպասել Հայոց ցեղասպանության 100-ամյա տարելիցին: Այս մասին ասաց ԱՄՆ Մասաչուսեթսի համալսարանի դասախոս, պրոֆեսոր, 1915թ. ոճրագործությունների թեմայով աշխատությունների ու հոդվածների հեղինակ, թուրք հայտնի պատմաբան Թանըր Աքչամը՝ «Առաջին լրատվական»-ի հետ զրույցում անդրադառնալով Ռեջեփ Թայիփ Էրդողանի նախագահությանն ու Թուրքիայի «նոր» իշխանությունների կողմից հայկական հարցին հատկացվելիք հնարավոր ջանքերին:
Նա նշեց, որ Էրդողանի նախագահությունից մեծ փոփոխություններ ակնկալել պետք չէ, «Արդարություն և զարգացում» կուսակցությունը շարունակելու է իր քաղաքականությունը, ուստի կարելի է ենթադրել, որ Էրդողանի նախագահությունն ու Դավութօղլուի վարչապետությունը չեն փոխելու իրավիճակը: Նրա որակմամբ՝ առանցքայինն այն է, որ ականատես ենք լինելու Էրդողանի իշխանությանն ու իր արդեն հայտնի քաղաքականությանը Թուրքիայում:
«Ինչ վերաբերում է հայկական հարցին՝ մասնավորապես 2015թ., ապա իմ անձնական կարծիքով՝ Էրդողանը կգնա մեկ քայլ ավելիի, քան իր այս տարվա փորձը, երբ նա ներողություն խնդրեց Ցեղասպանության ժառանգներից: Ես ակնկալում եմ, որ սրանից մեկ քայլ ավելի կարելի է սպասել, թեև հստակ հնարավոր չէ ասել, թե ինչ քայլ կարող է լինել: Վստահաբար կարելի է ասել, որ նրա քայլն այն չի լինելու, ինչ մարդիկ են սպասում: Այսինքն՝ նոր իշխանությունը չի կարող բավարարել հայկական կողմի և Թուրքիայի մտավորականության պահանջը, այսինքն՝ նրանք վստահաբար չեն անվանի 1915թ. հանցագործություն, սա կլինի ջախջախիչ քայլ իրենց համար»,- մեկնաբանեց Թանըր Աքչամը:
Հարցին՝ Էրդողանն ինչպե՞ս կարձագանքի ՀՀ նախագահ Սերժ Սարգսյանի կողմից 2015թ. ապրիլի 24-ին Հայաստան ժամանելու հրավերքին, թուրք պատմաբանը պատասխանեց, որ Էրդողանը չի ընդունի ՀՀ նախագահի հրավերը 2015թ. ապրիլի 24-ին այցելել Հայաստան, նա կմերժի այս հրավերքը: Սակայն, նրա խոսքով, էրդողանը հետաքրքիր քաղաքական գործիչ է, նա անակնկալներ հաճախ է մատուցում և սիրում է անակնկալներ:
«Օրինակ՝ որևէ մեկը չէր էլ սպասում, որ նա ներողություն կխնդրի: Այսինքն՝ հնարավոր է քայլ սպասել, բայց ես վստահ չեմ, որ դրական անակնկալ կլինի դա: Նրանք շարունակելու են արդարադատության և հիշողության իրենց քաղաքականությունը, այսինքն՝ միայն հայերը չէ, որ տուժել են այդ շրջանում, տուժել են նաև թուրքերը, և հայերը պետք է հիշեն թուրքերի տառապանքները ևս: Սա է լինելու այդ հռետորաբանությունը: Ես չեմ կարծում, որ նրանք հրաժարվեն այս տեսությունից: Սա է կարևոր չափանիշը: Ենթադրում եմ, որ սփյուռքի հայերին քաղաքացիություն կտրվի նրանց ցանկության դեպքում»,- ասաց Աքչամը՝ շարունակելով, որ Թուրքիայի իշխանությունները ջանալու են տպավորություն ստեղծել, որ նրանք հայ-թուրքական հարաբերությունների կարգավորման գործընթացը ցանկանում են առաջ տանել, բայց հայկական կողմն է, որ խոչընդոտում է գործընթացի դրական զարգացմանը:
Հիշեցնենք, որ օրերս կայացավ Թուրքիայի նորընտիր նախագահ Ռեջեփ Թայիփ Էրդողանի երդմնակալության արարողությունը, որին մասնակցեց նաև ՀՀ ԱԳ նախարար Էդվարդ Նալբանդյանը, ով Թուրքիայի նորընտիր ղեկավարին հանձնեց ՀՀ նախագահ Սերժ Սարգսյանի հրավերը հաջորդ տարի այցելել Հայաստան Հայոց ցեղասպանության 100-ամյա տարելիցի օրը:
