Մոսկվան հույս ունի, որ հայ և ադրբեջանական կողմերի միջև ողբերգական ելքով միջադեպերը չեն կրկնվի, քանի որ դա չի նպաստում ղարաբաղյան հակամարտության կարգավորմանը, և ափսոսանք է հայտնում այդ կապակցությամբ: Այս մասին, ըստ РИА Новости-ի, հայտարարել է Ռուսաստանի ԱԳՆ պաշտոնական ներկայացուցիչ Ալեքսանդր Լուկաշևիչը:
Բաքուն մեղադրում է հայկական կողմին 9-ամյա երեխայի սպանության մեջ` սահմանամեձ Օրթա Քրվենդ գյուղում, մինչդեռ չճանաչված Լեռնային Ղարաբաղն ու պաշտոնական Երևանը հերքում են նման մեղադրանքը:
«Ես գիտեմ այդ միջադեպի մասին: Տարածաշրջանում աշխատում էր ԵԱՀԿ գործող նախագահի հատուկ բանագնաց Կասպշիկի առաքելությունը, որը շփման գծում միջադեպերի հանգամանքները պարզելու մանդատ ունի: Իհարկե, ողբերգական ելքով ցանկացած միջադեպ ցավալի է»,- ասել է Լուկաշևիչը` պատասխանելով լրագրողների հարցին, թե ինչ արձագանք է տալիս Ռուսաստանը 9-ամյա երեխայի սպանությանը:
«Հույս ունենք, որ նման միջադեպերը քիչ կլինեն, իսկ իդեալական տարբերակում անհրաժեշտ է, որ դրանք ընդհանրապես չլինեն: Անհրաժեշտ է, որ հակամարտող կողմերը համագործակցության ու երկխոսության մթնոլորտ ստեղծեն»,- նշել է Ռուսաստանի ԱԳՆ պաշտոնական ներկայացուցիչը: