Երկրորդ նախագահ Ռոբերտ Քոչարյանի հերթական հարցազրույցը համընկավ ՀՀԿ-ի հերթական գործկոմի նիստին, կամ ավելի ճիշտ՝ ՀՀԿ-ի ոչ այնքան հերթական նիստին, այն տեսանկյունից, որ այդ նիստը կայանալու էր օգոստոսի 28-ին՝ ինչպես սովորաբար ամեն հինգշաբթի, սակայն այս անգամ, ինչն իհարկե լինում է երբեմն, այն հետաձգվել էր և կայացավ օգոստոսի 29-ին: Եվ ահա, այս տեսանկյունից Քոչարյանի հարցազրույցը՝ արդեն հայտնի շեշտադրումներով և սեփական տնտեսական քաղաքականության առավելությունների նկարագրությամբ, հետաքրքրականորեն համընկավ ՀՀԿ գործկոմի նիստի հետ, որից հետո, ի դեպ, և՛ խոսակ Շարմազանովը, և՛ վարչապետ Հովիկ Աբրահամյանը չեն արձագանեքել հարցազրույցին:
Հովիկ Աբրահամյանը, որը սովորաբար ՀՀԿ ԳՄ նիստի օրերին շփվում է լրագրողների հետ, այս անգամ նախընտրել է չխոսել և այստեղ, մեղմ ասած, շատ մեծ է հավանականությունը, որ պատճառը Քոչարյանի հարցազրույցին անդրադարձից խուսափելն է: Աբրահամյանի համար այս թեման իսկապես զգայուն է, քանի որ Քոչարյանը, անկասկած, նախագահական պաշտոնի համար նրա գլխավոր մրցակիցներից մեկն է, եթե ոչ գոնե այս պահի դրությամբ ամենագլխավորը:
Երկրորդ նախագահի հարցազրույցն ըստ էության գրեթե ամբողջությամբ անուղղակի հարված էր նաև Հովիկ Աբրահամյանին, որն այսօր տնտեսական քաղաքականության պատասխանատուն է: Հովիկ Աբրահամյանի համար իհարկե դժվար է նման իրավիճակում ինչ-որ բան ասել: Ինչպես Քոչարյանը, այնպես էլ Հովիկ Աբրահամյանը պայքարում են ըստ էության նույն բանի համար, և նույնն են նրանց, այսպես ասած, թիրախները՝ ոչիշխանական քառյակ, ՀՀԿ-ի քրեաօլիգարխիկ սեգմենտ և, բնականաբար, արտաքին հավանություն: Սրան զուգահեռ, նրանց համար նույնն են նաև ռիսկերը՝ կորցնել ամեն ինչ, հեռանկարները կորցնելու դեպքում, քանի որ տարածաշրջանային զարգացումները չափազանց դինամիկ ու սուր են դառնում, և իշխանական լծակներից զրկված լինելը ավելի ու ավելի մեծ ռիսկեր է առաջացնում կապիտալից և անգամ ազատությունից զրկվելու առումով: Այսինքն՝ խաղն իսկապես բավական մեծ խաղադրույքներով է, ու չնայած մրցակցությանը՝ և՛ Ռոբերտ Քոչարյանը, և՛ Հովիկ Աբրահամյանը իհարկե ակնկալում են պահպանել այնպիսի հարաբերություններ, որ մեկի հաղթանակի դեպքում հնարավոր լինի պայմանավորվել մյուսի որոշակի ստատուսի պահպանության կապակցությամբ:
Նման բարդ պայմաններում Հովիկ Աբրահամյանի համար, բնականաբար, շատ դժվար է բաց հակադրության մեջ մտնել Քոչարյանի հետ. մեկ էլ տեսար՝ հաղթեց: Միևնույն ժամանակ, Աբրահամյանի և Քոչարյանի համար կա մեկ ուրիշ խնդիր. եթե հանկարծ նախագահական ընտրություններին մոտ ժամանակում Սերժ Սարգսյանը խաղի մեջ մտցնի բոլորովին նոր թեկնածուի: Այս դեպքում Ռոբերտ Քոչարյանն ու Հովիկ Աբրահամյանը, լինելով մրցակիցներ, ամենայն հավանականությամբ, ստիպված կլինեն մտածել այդ թեկնածուի դեմ միանալու մասին:
Ռոբերտ Քոչարյանի նախկին հարցազրույցները Հովիկ Աբրահամյանի համար սպասված էին, քանի որ դրանք ըստ էության նպաստում էին Տիգրան Սարգսյանի դիրքերը քանդելուն: Սակայն իրավիճակը արդեն այլ է, և Քոչարյանի հարցազրույցները վարչապետ Հովիկ Աբրահամյանի համար դառնում են փորձություն:
