ԵԱՀԿ Մինսկի խմբի համանախագահներ Ռոբերտ Բրադկեն, Բերնար Ֆասիեն և Իգոր Պոպովը մարտի 23-24-ը Վիեննայում Մինսկի խմբին և ԵԱՀԿ գլխավոր քարտուղար Մարկ Պերրեն դե Բրիշամբոյին ներկայացրել են Լեռնային Ղարաբաղի հակամարտության կարգավորման գործընթացի վերջին զարգացումներն ու որպես միջնորդներ իրենց գործունեության արդյունքները:
Համանախագահները նշել են, որ անմխիթար իրավիճակը տարածաշրջանում ևս մեկ անգամ ապացուցում է, որ ստատուս քվոն անընդունելի է և միայն հակամարտության խաղաղ և բանակցային կարգավորումը կարող է ավելի լավ և հաստատուն ապագայի հեռանկարներ բացել այն մարդկանց համար, ովքեր ապրում էին և ապրում են այնտեղ:
Համանախագահները նաև տեղեկացրել են, որ մոտ ապագայում այցելելու են տարածաշրջան հակամարտության խաղաղ կարգավորման հիմնարար սկզբունքների շուրջ քննարկումները շարունակելու համար` օգտվելով Սոչիում մարտի 5-ին Հայաստանի, Ռուսաստանի և Ադրբեջանի նախագահների հանդիպման արդյունքում առաջացած դրական տեղաշարժից: Նրանք կոնկրետ միջոցառումներ կմշակեն, որոնք թույլ կտան կյանքի կոչել Սոչիում ստանձնած պարտավորությունները հրադադարի խախտումների վերաբերյալ բոլոր կողմերի մասնակցությամբ հետաքննություններ անցկացնելու մասին:
Հերթական անգամ ընդգծելով, որ հակամարտության կողմերը պետք է զսպվածություն ցուցաբերեն ինչպես իրենց իրականացրած քայլերում, այնպես էլ հրապարակային կոչերում, համանախագահներն անընդունելի են որակել ուժի կիրառման սպառնալիքը, այդ թվում` քաղաքացիական օդանավերի նկատմամբ: Համանախագահները «խստորեն դատապարտում են սպանությունների և հակահարվածների անիմաստ շրջապտույտն առաջին գծի երկայնքով և վերահաստատում իրենց դիրքորոշումը, որ կողմերը պետք է պատրաստեն իրենց հասարակություններին խաղաղության, այլ ոչ թե պատերազմի:
