Մամուլում մշտապես բարձրաձայնվել է Երևանի պետական համալսարանում առկա կոռուպցիոն երևույթների մասին: Պետական բյուջեից սնվող այս բուհը պետության միջոցները յուրացնում է ըստ նպատակահարմարության: Այդ գումարների մեծ մասը բուհը եւ բուհի որոշ պաշտոնյաներ հիմնականում դուրս են գրում եւ գրպանում են բուհի այս կամ այն կարիքի համար հայտարարված տենդերների շնորհիվ: Այդպիսի մի տենդեր այս տարի հայտարարվել է համալսարանում որոշակի շինաշխատանքների, հատկապես կենտրոնական մասնաշենքի բակային մեծ աստիճանների նորոգման համար, որի համար տենդերը շահած շինարարական կազմակերպությանը հատկացվել է 600 հազար դոլարին համարժեք գումար: Բացի այդ՝ բավականին ուռճացված բյուջեով տենդեր է հայտարարվել նաև համալսարանը նոր գույքով՝ ուսաղողական սեղան-աթոռներով ապահովելու համար: Կրկին տենդերը շահել է ինչ-որ կազմակերպություն, համալսարանից հեռացվել է հին գույքը, և կարճ ժամանակ անց բերվել է նորը, որը, ինչպես ավելի ուշ պարզվել է, բնավ էլ նոր գույք չի եղել, այլ համալսարանից հեռացված հին սեղան-աթոռները, որոնք տենդերը շահած կազմակերպությունը պարզապես ներկել, թարմացրել է ու հետ է բերել՝ դրա դիմաց ստանալով նոր գույքի համար նախատեսված ամբողջ գումարը:
Այն, որ երկու դեպքում էլ և, առհասարակ, տենդերը շահած կազմակերպությունները ԵՊՀ պաշտոնյաներից որևէ մեկին է պատկանում, պարզից էլ պարզ է: Հակառակ դեպքում պետհամալսարանը խելքից դուրս, որևէ տրամաբանության սահմաններում չտեղավորվող ծախսեր թույլ չէր տա իրեն: Կամ գոնե այդ գումարը կուղղեր բուհի պրոֆեսորադասախոսական կազմի աշխատավարձերի բարձրացմանը, որպեսզի նրանք նախանձ աչքով չնայեին, ասենք, մանկավարժական համալսարանի դասախոսներրի ստացած աշխատավարձին:
Բացի այդ, ունենք վառ օրինակ, թե ինչպես անցած տարի ԵՊՀ ղեկավարությունը որոշեց ազատվել տարիներ շարունակ համալսարանի բուֆետները շահագործող Hi Lunch ընկերությունից, միակողմանի խզեց պայմանագիրը, որպեսզի այս բիզնեսն իր ձեռքը վերցնի: Իսկ այդ բիզնեսն աշխատեցնում է ԵՊՀ աշխատակազմի ղեկավար Ալիկ Ղարիբյանը, որն արդեն իսկ հասցրել է իրենով անել ԵՊՀ-ին առնչվող մի շարք այլ եկամտաբեր գործեր:
ԵՊՀ ռեկտոր Արամ Սիմոնյանն «Առաջին լրատվական»-ի հետ զրույցում բամբասանք որակեց տենդերների, շինաշխատանքների վրա աստղաբաշխական գումարների ներդրման հետ կապված տեղեկությունները: «Դրանք հիմարություններ են և իրականությունից զուրկ բամբասանքներ»,- հայտարարեց ռեկտորը: Մեր լրացուցիչ հարցադրումներին Սիմոնյանը հրաժարվեց պատասխանել, կրկին պնդելով, որ դրանք բամբասանքներ են, ու պարզապես անջատեց հեռախոսը:
ԵՊՀ-ում, սակայն, կոռուպցիան և պետության միջոցների վատնումը միայն այդքանով չեն սահմանափակվում: Որոշ տեղեկություններով՝ բավական լուրջ կոռուպցիոն երևույթներ կան նաև ուսանողների՝ մի ֆակուլտետից մեկ այլ ֆակուլտետ տեղափոխելու, ստացիոնար համակարգից հեռակա և հակառակ գործընթացում, ինչպես նաև ուսանողների փոխանակության ծրագրերում: Դրանցից յուրաքանչյուրը ֆիքսված արժեք ունի: Եվ եթե բուհի կողմից տենդերների միջոցով պետության միջոցների վատնումն անարձագանք է մնում, ապա վերը նշված դեպքում, «Առաջին լրատվական»-ի տեղեկություններով, իրավապահ մարմիններն արդեն իսկ հետաքրքրված են: Տևական ժամանակ է՝ մայր բուհը հայտնվել է նրանց տեսադաշտում:
Լուսանկարը` PAN Photo-ի
