«Ասպարեզ» ակումբի խորհրդի նախագահ Լևոն Բարսեղյանի կարծիքով՝ սպասել, որ Սերժ Սարգսյանն իր նստավայրի առաջ 2000-անոց պիկետներից ազդվելու և հայտարարելու է, թե՝ «ղալաթ եմ արել սեպտեմբերի երեքին նման բան եմ հայտարարել»՝ անիմաստ է: Բարսեղյանը նման կարծիք հայտնեց «Առաջին լրատվական»-ի հետ զրույցում՝ ասելով, որ նախորդ տարվա ընթացքում 2000-2500 մարդ Հայաստանի ինքնիշխանության համար պայքարում էր:
«Ցավոք, հասարակության մեջ դա լայն փոփոխությունների չհանգեցրեց, որ ասենք՝ իշխանական համակարգը իր պարագլխին ինչ-որ բաներ պարտադրի: Իսկ Սերժ Սարգսյանը գտնում է, որ իր իշխանության երկարակեցության համար Կրեմլն ինչ ասի՝ ինքը համաձայն է: Եթե վաղը Կրեմլն ասի, որ Հայաստանը ցանկություն է հայտնել միանալու Ինդոնեզիային, նա էլի կկանգնի ու նման բան կհայտարարի»:
Մեր զրուցակցի խոսքերով՝ նախորդ տարվա ընթացքում Սարգսյանն ապացուցել է, որ իրականությունն ադեկվատ չի ընկալում. «Պարբերաբար հակաճառում էր ինքն իրեն, սկսեց վերագրել մի բան Հայաստանի հանրությանը, որոնց հետ Հայաստանը կապ չուներ: Աստանայում վեր է կենում և ասում, որ Հայաստանի հասարակությունը և գործարար հանրությունը իր համար նախանշել է հունիսի կեսը որպես ԵՏՄ-ին անդամակցելու ժամկետ, բայց նման նախաշնում Հայաստանի քաղաքացիական հասարակությունը չի արել: Չեն ասել, ինչ եղավ այդ անտեր Մաքսային միությունը, կոտորվեցինք, եկեք շուտ անդամակցենք…»:
Միևնույն ժամանակ, չնայած այդ ամենին, չի հաջողվել խորքային հասարակական տրամադրություններ փոխել. «Նկատի ունեմ հասարակական տրամադրություններ փոխել այս ռեժիմին ժամ առաջ տուն ուղարկելու առումով և ոչ՝ ասենք Մաքսային միությանը կամ Եվրասիական տնտեսական միությանն անդամագրվելու իմաստով»:
Ինչ վերաբերում է վարչապետ Դմիտրի Մեդվեդևի ժամանման օրը բողոքի ակցիա իրականացնելու խոսակցություններին, Լևոն Բարսեղյանն ասաց. «Որևէ բան կազմակերպելուց առաջ պետք է իմանանք, թե որն է այդ այցելության նպատակը: Եթե գալու են այստեղ ուտեն-խմեն ու գնան՝ դա ուրիշ: Եթե գալու են հերթական ղազագիրը դեմ տան, ու Սերժ Սարգսյանն էլ շատ խելոք ստորագրի, ինչպես դեկտեմբերի երկուսին գազի պայմանագիրը ստորագրեց՝ դա ուրիշ է: Առայժմ տեղյակ չեմ, եթե այնպիսի բան նկատեմ, որ հերթական անգամ Հայաստանի ինքնիշխանությունն է այս ռեժիմը նվիրում կամ հանձնում՝ բնական է, ես էլ բողոքով ոտքի կելնեմ»,-եզրափակեց նա:
Ամբողջությամբ՝ մեր տեսանյութում: