Երեկ Կալիֆոռնիայի Սենատը ճանաչել է Լեռնային Ղարաբաղի Հանրապետության անկախությունը: ԱՄՆ հինգերորդ նահանգն է, որ ճանաչում է ԼՂՀ անկախությունը:
Արդյոք այս քայլը կարո՞ղ էր դուրս լինել Վաշինգտոնի դիրքորոշումից, և որքանո՞վ էր դա հայկական կազմակերպությունների ջանքերի արդյունքը:
«Ոչ միայն Վաշինգտոնի հետ համաձայնեցված չէր այս որոշումը, այլև ճիշտ հակառակը՝ Վաշինգտոնը թունդ հակառակ էր, որ Կալիֆոռնիայի Սենատը այսպիսի որոշում կայացնի»: Այս մասին «Առաջին լրատվական»-ի հետ զրույցում ասաց «Կալիֆոռնիա կուրիեր» թերթի հրատարակիչ, խմբագիր Հարութ Սասունյանը:
Նրա խոսքով՝ Կալիֆոռնիա նահանգի Սենատն անկախ է Վաշինգտոնի որոշումներից, և իրենց չի մտահոգում, թե ինչ է ասում Վաշինգտոնն այս մասին: Կալիֆոռնիայի նահանգի Սենատը իրավունք ունի ինքնուրույն որոշումներ կայացնելու՝ անկախ նրանից, թե Վաշինգտոնն ինչ է մտածում այդ հարցի մասին:
Հարցին ի պատասխան՝ հայկական կազմակերպությունները որքանո՞վ ազդեցություն ունեցան այս որոշման վրա, Հարութ Սասունյանը նշեց. «Հայկական կազմակերպությունները և ամենակարևորը՝ Կալիֆոռնիայի հայ ժողովուրդը մեծ դերակատարություն ունեցան, հազարավոր դիմումներ գրեցին այս հարցի հետ կապված, որ ընդունվի, և բավական ճնշում բանեցվեց Կալիֆոռնիայի Սենատի վրա Ադրբեջանի լոբբիստական կազմակերպությունների կողմից, փորձեցին խոչընդոտել բանաձևի ընդունմանը, սակայն չհաջողեցին»,-հավելեց զրուցակիցս:
Արդեն ԱՄՆ հինգերորդ նահագն է, որ ճանաչում է ԼՂՀ անկախությունը։ Ինչո՞ւ այս որոշումը վարակիչ չի դառնում մյուս նահանգների համար: Հարութ Սասունյանի խոսքերով՝ ԱՄՆ բոլոր նահանգները որևէ պատճառ չունեն Արցախի անկախությունը ճանաչելու, Արցախը հողատատարածք է, որը որևէ կապ չունի ԱՄՆ նահանգների հետ, և այն նահանգները, որտեղ մեծ թվով հայեր կան, այդ նահանգների հայ ներկայացուցիչները դիմում են և լոբբի են անում, փորձում համոզել, որ ընդունեն, մանավանդ այն դեպքում, երբ նահանգահները չեն զբաղվում արտաքին հարցերով, և Վաշինգտոնն է զբաղվում արտաքին հարցերով:
«ԱՄՆ 50 նահանգները իրենք ինքնուրույն կարող են որոշումներ կայացնել։ ԱՄՆ Սահմանադրությունը հստակ ձևով ասում է, որ ԱՄՆ արտաքին քաղաքականությունը որոշում է Վաշինգտոնը, ոչ թե նահագները: Դրա համար նահանգները իրավունք չունեն խառնվելու արտաքին հարաբերություններին: Սա է ԱՄՆ սահմանադրությունը»,- ասաց նա:
Հարութ Սասունյանը հավելեց, որ Կալիֆոռնիա նահանգի հայ բնակչությունը խնդրել է իր ներկայացուցիչներին, որ ճանաչեն Արցախի անկախությունը, և նրանք էլ ճանաչել են ԼՂՀ անկախությունը՝ կատարելով իրենց բնակիչների փափագը: