Մինչև շաբաթվա վերջ Եվրամիության ղեկավարները պետք է կողմնորոշվեն ԵՄ կենտրոնական թափուր պաշտոնների՝ Եվրոպական խորհրդի նախագահի (Հերման Վան Ռոմպեյի փոխարեն) և ԵՄ արտաքին քաղաքականության և անվտանգության հարցերով գերագույն հանձնակատարի (Քեթրին Էշթոնի փոխարեն) թեկնածուների հարցում: Որոշումը կարող է ընդունվել արդեն վաղը՝ ԵՄ արտահերթ գագաթնաժողովի ժամանակ, գրում է kommersant.ru-ն: Երեկ Բրյուսելում նախապատրաստական հանդիպում են անցկացրել ԵՄ 28 անդամ երկրները:
Օգոստոսի 30-ին արտահերթ գագաթնաժողով անցկացնելու որոշումն ընդունվել էր ԵՄ ղեկավարների հուլիսյան հանդիպման ժամանակ: Այն ժամանակ չհաջողվեց ո՛չ եվրահանձնակատարների շրջանում պորտֆելները բաշխել, ո՛չ կարևորը՝ ընտրել Հերման Վան Ռոմպեյի և Քեթրին Էշթոնի իրավահաջորդներին:
Եվրոպական օրենսդրության համաձայն՝ Եվրախորհրդի նախագահն ընտրվում է ձայների որակական մեծամասնությամբ, երկուսուկես տարի ժամկետով, մեկ անգամ երկարաձգելու հնարավորությամբ: Իսկ ԵՄ ԱԳՆ ղեկավարն ընտրվում է 5 տարով՝ նույնպես ձայների մեծամասնությամբ: Սակայն kommersant.ru-ի զրուցակիցների կարծիքով՝ երբ Բրյուսելում ԵՄ անդամ երկրների ղեկավարները լրջորեն վիճեցին պրն Յունկերի թեկնածության շուրջ, հիմա այս երկու որոշումները նրանք կփորձեն միաձայն ընդունել:
Ըստ kommersant.ru-ի՝ հաշվի առնելով պարոնայք Յունկերի և Շուլցի քաղաքական պատկանելությունը՝ թափուր տեղերի համար, ավելի շուտ, մի քաղաքական գործչի կնշանակեն աջերից և մեկին՝ ձախերից:
ԵՄ ղեկավարի պաշտոնի թեկնածուների թվում նշում են Դանիայի սոցիալ-դեմոկրատների ղեկավար Հելլե-Թորնինգ Շմիդտին: Եթե, օրինակ, ԵՄ անդամները Շմիդտին հաստատեին, Սլովենիայի նախկին վարչապետ Ալյոնկա Բրատուշեկը հնարավորություն չէր ունենա դառնալ ԵՄ ԱԳՆ ղեկավար. նա ևս սոցիալ-դեմոկրատ է:
The Guardian թերթը պարզել է, որ Մեծ Բրիտանիայի վարչապետ Դևիդ Քեմերոնը պատրաստ է Եվրախորհրդի ղեկավարի պաշտոնում պաշտպանել Լեհաստանի վարչապետ Դոնալդ Տուսկին. երկուշաբթի նրանք հեռախոսազրույց են ունեցել: