«Առաջին լրատվական»-ը զրուցել է ՀՀ ԳԱԱ արևելագիտության ինստիտուտի ավագ գիտաշխատող Վահրամ Տեր-Մաթևոսյանի հետ:
-Պարոն Տեր-Մաթևոսյան, Կալիֆոռնիայի Սենատի կողմից ԼՂՀ անկախության ճանաչումը ի՞նչ նշանկություն ունի, և կարո՞ղ է դա շղթայական ռեակցիա ունենալ։
-Երկու կարծիք չկա, որ սա քաղաքական շատ կարևոր քայլ է: Կալիֆոռնիան դարձավ ԱՄՆ 5-րդ նահանգը, որը ճանաչեց ԼՂՀ անկախությունը: Իհարկե, սա շատ լավ փաստ է, ուրախալի է, բայց եթե այս քաղաքական կարևոր քայլին չհետևեն ոչ պակաս կարևոր քաղաքական նախաձեռնություններ Արցախի կողմից, ապա դա կմնա կամ կարող է դիտվել որպես խորհրդանշական: Կալիֆոռնիայի պես կարևոր նահանգի կողմից նման քաղաքական քայլը ենթադրում է, որ սա հնարավորություն է, որպեսզի Արցախի իշխանությունները կարողանան առավելագույնը քաղել սրանից: Ես նկատի ունեմ՝ ընդհուպ ներկայացուցչության հիմնումը Կալիֆոռնիայում և այն բոլոր նահանգներում, որոնք ճանաչել են Արցախի անկախությունը:
-Իսկ Հայաստանի կողմից ի՞նչ քայլեր պետք է հաջորդեն: Այսպիսով, մեր առջև ԼՂՀ անկախության ճանաչման խնդիր չի դրվում:
-Ցանկալի է, որ Արցախը լինի այս ամենի հիմքում կանգնած: Հայաստանի դիրքորոշումը հայտնի է, Հայաստանը չի ճանաչում ԼՂՀ անկախությունը պարզ պատճառներով, և նշված են այն պայմանները, որոնց դեպքում ԼՂ անկախությունը Հայաստանը կճանաչի: Չեմ կարծում, որ այս պահին հիմքեր կան վերանայումների համար:
Ոչ միայն ամերիկյան ուղղությամբ, այլև Ավստրալիայի ուղղությամբ. Նոր հարավային Ուելսի կողմից ԼՂՀ անկախության ճանաչումը փոխում է միջազգային հարաբերությունների դինամիկան։ Նմանատիպ հնարավորությունը պետք է շատ խելամիտ օգտագործել: Սա աննախադեպ է լայն առումով միջազգային հարաբերություններում, երբ ֆեդերալ համակարգ ունեցող երկրի միավորը, սուբյեկտը, նահանգը ճանաչում է այսպես ասած՝ չճանաչված պետություն, սա կոչված է փոխելու ամբողջ միջազգային հարաբերությունների պարադիգման. պետք է սա ճիշտ օգտագործել: Վստահ եմ՝ կարևոր հետևություններ կարվեն և կարևոր նախաձեռնություններ կլինեն այս ուղղությամբ:
Հարցազրույցն ամբողջությամբ՝ տեսանյութում։