Սփյուռքահայ ներդրող Էդմոն Խուդյանը, հույսը կտրելով Հայաստանում արդարադատության հասնելուց, դիմել է Վաշինգտոնի ներդրումային վեճերի կարգավորման միջազգային դատարան (INTERNATIONAL COURT FOR SETTLEMENT OF INVESTMENT DISPUTES): Այս միջազգային դատարան հնարավոր է դիմել 1994-1996 թվականներին Ամերիկայի Միացյալ Նահանգների և Հայաստանի կառավարությունների միջև ստորագրված համապատասխան փաստաթղթի շրջանակներում: Այն ամերիկացի ներդրողներին հնարավորություն է տալիս իրենց ներդրումային վեճերը լուծել այդ ընթացակարգով:
«Հայաստանում իմ գործով դեռևս շարունակական հարցաքննություններ են տեղի ունենում, որոնց ես տեղյակ չեմ և մասնակից չեմ: Մինչ օրս ինձ տուժող չեն ճանաչում, և ես միայն միջազգային դատարանում եմ իմ գործընթացը տեսնում: Շարունակական սպասելով՝ հասկացա, որ հնարավոր է՝ արդյունքի չհասնեմ, այդ պատճառով էլ որոշեցի գնալ միջազգային դատարանի ճանապարհով: Մենք արդեն սկսել ենք գործընթացը, և շուտով գործը կմտնի դատարան,- «Առաջին լրատվական»-ի հետ զրույցում ասաց Խուդյանը՝ հավելելով,- միջազգային դատարանն ավելի հստակ և վերջնական այս հարցը կլուծի, քան Հայաստանում, որտեղ միայն Աստված գիտի, թե իրավական համակարգը ինչ որոշում կկայացնի, ում ձեռնտու կլինի այդ որոշումը: Իսկ այս դեպքում ներկայացվել են բացահայտ փաստեր, որոնցից ակնհայտ է դառնում, թե հայաստանյան իրավական համակարգն ինչ խտրականություն է դրսևորել իմ նկատմամբ: Ես կարծում եմ, որ իրենք քաջ գիտակցելով այն հանգամանքը, թե ովքեր են ներգրավված այս գործում, չեն ուզում ավարտել: Ամիսներ առաջ հանդիպեցի գլխավոր դատախազին, որը հավաստիացրեց, որ 1-2 ամսից վերջնական լուծում կլինի, բայց նա էլ կանգ առավ, քանի որ հասկացավ, թե գործի գլխին ովքեր են կանգնած»,- հավելեց գործարարը:
Միջազգային դատարանից սպասելիքները շատ մեծ են, իսկ վերջնական լուծումը ենթադրում է նյութական խոշոր փոխհատուցում: Ընդ որում, Խուդյանի խոսքով, փոխհատուցումը կտրվի ոչ միայն իրեն, այլև այդ վիճահարույց շենքի բազմաթիվ այլ գնորդների: «Սա հայաստանյան իրավական համակարգը չէ, սա Վաշինգտոնի միջազգային դատարանն է, որտեղ ամեն ինչին նայում են՝ որպես օրենքի: Բնականաբար, արդյունքը շատ մեծ կլինի»,- նկատեց նա:
Նշենք, որ տարիներ առաջ հենց այս նույն ճանապարհով արդարադատության հասավ նաև «Գլոբալ Գոլդ Մայնինգ» ՍՊԸ տնօրեն Վան Գրիգորյանը, որը դատական վեճի մեջ էր ԱԺ պատգամավոր Վարդան Այվազյանի հետ: Վան Գրիգորյանը նույն միջազգային դատարանի միջոցով Հայաստանից հետ ստացավ հսկայական փոխհատուցում, որի չափը, դատավճռի համաձայն, այդպես էլ չհրապարակվեց:
Ի դեպ, Էդմոն Խուդյանի դեպքում էլ է հայցը ներկայացրել հենց Վան Գրիգորյանի իրավաբանը Նյու Յորքից: Հետևաբար ենթադրվում է, որ Խուդյանն էլ արդարադատության կհասնի, և հերթական անգամ Հայաստանի իրավական համակարգի սխալների և ընտրողաբար մոտեցման պատճառով կտուժեն հայաստանյան հարկատուները:
