«Միգուցե Հայաստանում միջավայրը ագրեսիվ չէր և նպաստավոր էր, այդ պատճառով ԵԱՀԿ գործող նախագահը նման հայտարարություն հենց Հայաստանում արեց»,- «Առաջին լրատվականի» հետ զրույցում կարծիք հայտնեց ԱԺ ՀՀԿ խմբակցության պատգամավոր Հովհաննես Սահակյանը` խոսելով դիպուկահարների վերաբերյալ ԵԱՀԿ գործող նախագահի Հայաստանում արված հայտարարության մասին:
Սակայն Սահակյանը կարծում է, որ եթե կոչեր կային անելու, ապա դրանք պետք է արվեին հենց Ադրբեջանում, քանզի հենց Ադրբեջանն է միշտ խախտել հրադադարի ռեժիմը և ավելի լայնամասշտաբ սադրանքների գնացել, որի արդյունքում եղել են զոհեր:
«Առնվազն անհասկանալի է, թե ինչո՞ւ է նման հայտարարությամբ հանդես եկել ԵԱՀԿ գործող նախագահը: Ես չեմ կարծում, որ դրդապատճառները և շարժառիթները ավելի խորքային են, միգուցե նաև պահի ազդեցության տակ է արվել այդ հայտարարությունը` խորը չգիտակցելով»,- նշեց Սահակյանը:
Պատգամավորի խոսքերով, եթե այդուամենայնիվ այդ հայտարարությունը արվել է խորը գիտակցելով, ապա տեղին է և ժամանակն է նշելու, որ մենք գործ ունենք բավականին փխրուն և զգայուն հարցի հետ, և գոնե այստեղ պետք չէ կիրառել այն երկակի ստանդարտները, որոնց մենք երբեմն ականատես ենք լինում միջազգային այս կամ այն կազմակերպությունների կողմից: