«Առաջին լրատվականը» տեղեկացրել էր, որ այսօր Կենտրոն-Նորք-Մարաշ վարչական շրջանների ընդհանուր իրավասության դատարան է բերվել ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանը: Դատական դռնփակ նիստում որոշում է կայացվելու, թե արդյոք դատարանը կբավարարի՞ հատուկ քննչական ծառայության միջնորդությունը. Հովհաննես Թամամյանի նկատմամբ կարող է կիրառվել 2 ամսվա նախնական կալանք:
«Առաջին լրատվականը» Հայաստանի լիբերալ կուսակցության նախագահ Հովհաննես Հովհաննիսյանին խնդրեց մեկնաբանել Հովհաննես Թամամյանին առնչվող այս տեղեկությունը, մասնավորապես հարցրեցինք` իշխանությունները օրինազանց պաշտոնյաների դեմ պայքա՞ր են մղում, թե՞ Հ.Թամամյանը ընդամենը ինչ-որ սահմաններ է անցել, որը իրավունք չուներ անցնելու. «Ավելի շատ ձեր նշած երկրորդ տարբերակն է, որովհետև սա այն խնդիրը չէ, որից կարելի է բխեցնել, թե իշխանությունը փորձում է արդարություն վերականգնել, կամ իրավապահ մարմիններում փորձում է արդարություն վերականգնել: Կարծում եմ, որ ներիշխանական հարաբերություններում Հովիկ Թամամյանը ինչ-որ բան խախտել է պայմանավորվածությունների շրջանակներում, կամ ինչ-որ բան խախտվել է, և ինքը ինչ-որ բան իրենց կլանի ներսում է խախտել, ու նրան պատժում են և կարծես բավական լուրջ են պատժում: Այստեղ մի փնտրեք իրավապահ մարմինների ձգտումը`բաց, թափանցիկ աշխատել, օրինազանցներին պատժել…»:
Մեր հարցին, թե սա ի՞նչ հետևանք կարող է ունենալ` Հովհաննես Հովհաննիսյանը պատասխանեց. «Հովիկ Թամամյանը շատ վաղուց է այս համակարգում, այս իշխանական թիմի անդամ է: Կարծում եմ` դա կախված է Հովիկ Թամամյանից` կդառնա՞ քավության նոխազ, թե՞ ոչ: Դա արդեն իր որոշումն է: Ամեն դեպքում` հետաքրքիր զարգացումներ կարող են ծավալվել»: