ԱԺ ԲՀԿ խմբակցության պատգամավոր Նաիրա Զոհրաբյանին զարմացրել է ԵԱՀԿ գործող նախագահի Հայաստանում կատարած հայտարարությունը դիպուկահարներին շփման գծից հետ բերելու վերաբերյալ:
«Տեղյակ լինելով Ադրբեջանի կարծր դիրքորոշմանը և իմանալով, որ իր այդ հայտարարությունը Ադրբեջանում ոչ մի արձագանքի չի արժանանա, ԵԱՀԿ գործող նախագահը փորձեց հայկական կողմին ասել, որ բարի կամք դրսևորի առաջին քայլը անելու համար: Բայց կարծում եմ, որ բացարձակապես տեղին չէր Հայաստանում նման կարգի հայտարարություն անելը»,- «Առաջին լրատվականի» հետ զրույցում կարծիք հայտնեց Զոհրաբյանը:
Զոհրաբյանը տեղեկացրեց, որ ԵԱՀԿ գործող նախագահի հետ հանդիպման ժամանակ ևս ինքը հստակ հարցադրումներ է ուղղել նրան` ասելով, թե ժամանակը չէ՞ արդյոք, որ ԵԱՀԿ համանախագահողները դադարեցնեն իրենց այսօրինակ գործելաոճը և չի կարծում արդյոք ԵԱՀԿ գործող նախագահը, որ եթե համանախագահների հայտարարությունները այսուհետ չլինեն հստակ և հասցեական, ապա դրանից բանակցային պրոցեսը միանշանակ տուժելու է: Պատգամավորը նշեց, որ իր հարցերը մնացել են անպատասխան:
Զոհրաբյանի գնահատմամբ, ԵԱՀԿ գործող նախագահը ինչ-որ բան շփոթել է, և նրա էմոցիաները պետք է արտահայտվեին Ադրբեջանում, որովհետև նա պիտի որ հրաշալի իմանար, որ Հայաստանը բազմիցս իր համաձայնությունն է տվել շփման գծից դիպուկահարներին հետ կանչելու համար, իսկ Ադրբեջանը համառորեն հրաժարվում է դիպուկահարներին ետ կանչել շփման գծից, և օրեր առաջ հենց Ադրբեջանը հրաժարվեց շփման գծում տեղի ունեցած հերթական մահվան ելքով գործի քննությունը թույլ տալուց:
«Ճիշտ կլիներ, որ ԵԱՀԿ գործող նախագահի էքսպրոմտ էմոցիան տեղի ունենար Ադրբեջանում և ԵԱՀԿ համանախագահները այսուհետ իրենց գործողություններում լինեին ավելի հասցեական»,- եզրափակեց Զոհրաբյանը: