Վաղը հանրապետության ողջ տարածքում կդիտվի առանց տեղումների եղանակ: «Առաջին լրատվական»-ի հետ զրույցում այս մասին տեղեկացրեց ԱԻՆ «Հիդրոմետ» ծառայության հիդրոօդերևութաբանական կանխատեսումների բաժնի պետ Գագիկ Սուրենյանը՝ ներկայացնելով առաջիկա օրերին հանրապետությունում սպասվող եղանակի տեսությունը:
Նա նշեց, որ ձնախառն անձրևը, որը տեղում է հանրապետությունում, այդքան էլ անսպասելի չէր, քանի որ ավելի վաղ կանխատեսվել էր, որ դեկտեմբերի 11-ին ցիկլոն է ներթափանցելու հանրապետության տարածք, և ինչպես հանրապետության շրջաններում, այնպես էլ մայրաքաղաքում տեղումներ են սկսվելու: Նա նկատեց, որ ավելի վաղ պարզապես չեն հստակեցրել, որ տեղումները ձյան տեսքով են լինելու:
«Փաստորեն, այսօր ձնախառն անձրև է տեղում, մայրաքաղաքի համարյա ոչ մի հատվածում ձնածածկ չի ձևավորվել, ձևավորվել է միայն բարձրադիր հատվածներում՝ 1 սմ ձյան ծածկ, որն էլ հալչում է: Այն կշարունակվի մինչև երեկո»,- ասաց Գ. Սուրենյանը:
Նրա հավաստիացմամբ՝ այս գիշերվա երկրորդ կեսին այս ցիկլոնը հեռանալու է, և վաղը հանրապետության ողջ տարածքում սպասվում է առանց տեղումների եղանակ, ավելին` ջերմաստիճանը կբարձրանա մինչև 6-7 աստիճանով, ցածրադիր հատվածներում հնարավոր է նաև մինչև 8 աստիճան տաքություն:
«Ցիկլոնը մեր հանրապետությունից կհեռանա Կասպից ծով, որից հետո հարավային տաք օդային հոսանքներ կսկսեն ներթափանցել հանրապետություն, որի արդյունքում ջերմաստիճանը կտաքանա»,- նկատեց մասնագետը:
Նա նաև հավաստիացրեց, որ հանրապետությունում մերկասառույցի վտանգ չկա, քանի որ ձնածածկ չի ձևավորվելու տեղացող ձնախառն անձրևի արդյունքում:
