Русских болельщиков посадят в клетку (ռուս երկրպագուներին նստեցնելու են վանդակում). հենց այսպես է վերնագրված այսօրվա Советский Спорт ռուսական մարզական պարբերականի այն հոդվածը, որում ռուս լրագրողները փորձել են ամփոփ ներկայացնել Հայաստան-Ռուսաստան խաղի շուրջ կատարվող իրադարձությունները:
Սկզբում նրանք եղել են «Հանրապետական» մարզադաշտում, որտեղ տեսել են երկրպագուների պատրաստած Հայաստանի հավաքականի 12 համարի մարզաշապիկը: Մարզադաշտում լրագրողները հանդիպել են նաև ՀՖՖ մամուլի քարտուղար Տիգրան Իսրայելյանին ու զարմացել, թե ինչու է հենց մամուլի քարտուղարը ղեկավարում գովազդային վահանակների տեղադրման պրոցեսը:
Այնուհետև փորձել են որևէ տեղեկություն ձեռք բերել Հայաստանի հավաքականի ֆուտբոլիստներից, սակայն նրանց բոլոր փորձերն ապարդյուն են անցել, ինչից լրագրողները եզրակացրել են, որ Հայաստանում լրագրողները ինֆորմացիայի դիֆիցիտի պայմաններում դիմում են վետերաններին, ովքեր ջանասիրաբար պատասխանում են բոլոր հարցերին:
Советский Спорт-ի լրագրողները այցելեցին նաև «Առաջին լրատվականի» խմբագրություն, որտեղ հարցազրույց վերցրին գլխավոր խմբագիր Արման Բաբաջանյանից` փետրվարի 1-ին Հայաստան-Ռուսաստան խաղի մասին թերթում տպագրված հոդվածի վերաբերյալ:
«Իրավապահ մարմինները մեզ չեն դիմել: Մեզ ոչ ոք դատի չի տվել, և դրա հիմքերն էլ չեն եղել. մենք կոնկրետ ոչ մեկին չենք մեղադրել: Այստեղ խոսքն ամենևին էլ հարցի մարզական կողմին չի վերաբերում, այլ քաղաքական և տնտեսական: Հնարավոր է, որ մենք պատրաստ ենք ի դեմս Ռուսաստանի տեսնել մեր մեծ եղբորը, սակայն երկրների միջև ձևավորված հարաբերություններն ավելի շուտ նման են տիրոջ և ծառայի հարաբերությունների: Այդ ամենն, իհարկե, մեր ժողովուրդներին չի տանում մերձեցման: Դուք տեսե՞լ եք հատուկ ռուս երկրպագուների համար պատրաստված վանդակը: Նման բան անգամ 2008 թվականին չեղավ, երբ Հայաստանի հավաքականն ընդունել էր Թուրքիայի ընտրանուն: Նույն թուրքերի, որոնք իրականացրել են հայ ժողովրդի Ցեղասպանությունը: Ուզում եմ հավատալ, որ այդ հանդիպումն արդար կլինի»:
Նշենք, որ ռուս լրագրողներն ամենևին էլ չզարմացան վերոնշյալ վանդակից և հավաստիացրին, որ ռուս երկրպագուների պարագայում դա շատ սովորական է: Նրանք չբացառեցին, որ անգամ հնարավոր է՝ այդ վանդակը կառուցվել է ռուսական կողմի խնդրանքով:
