Թուրք ազգայնականների Yeni Çağ թերթի հաղորդմամբ, «Ազգայնական շարժում» կուսակցության նախագահ Դևլեթ Բահչելին սուր քննադատության է ենթարկել վարչապետ Էրդողանին ու նրա գլխավորած կառավարությանը Լիբիայի հարցում երկերեսանի խաղ խաղալու համար.
«Ես տեսնում եմ, որ մեր կառավարությունը Լիբիայի հարցում շարունակ «ալեկոծության» մեջ է, քանի որ չունի որևէ պատրաստի գաղափար ու ռազմավարություն: Դժբախտաբար, մենք շարունակ ականատես ենք լինում իշխող կուսակցության` միմյանց հակասող հայտարարություններին, որոնք մեծ վնաս են հասցրել Թուրքիայի միջազգային վարկին»:
Բահչելին նաև հայտարարել է, որ Հյուսիսային Աֆրիկայում և Մերձավոր Արևելքում ծնունդ առած ժողովրդական շարժումները հանդիսանում են այդ երկրների ներքին խնդիրները, և ՆԱՏՕ-ն անելիք չունի այդ երկրներում:
Այստեղ լիովին պետք է համաձայնել թուրք ազգայնականի հետ, քանի որ Էրդողանը նախ հայտարարում է, որ Թուրքիան երբեք զենք չի ուղղի Լիբիայի դեմ, ապա նրա ծովային շրջափակման համար տրամադրում է միանգամից 6 ռազմանավ (4 ֆրեգատ, 1 օժանդակ նավ և 1 սուզանավ), այսինքն` առավել շատ, քան աշխարհի որևէ այլ երկիր:
