Մոտ 1500 մարդ է մասնակցել Աջարիայի մայրաքաղաք Բաթումում կայացած բողոքի հանրահավաքին, որն ուղղված էր քաղաքում գտնվող և անցած դարի կեսերին ավերված Ազիզե մզկիթի վերականգնման՝ վրաց-թուրքական նախատեսվող համաձայնագրի դեմ: Այս մասին հաղորդում է «Ազատություն» ռադիոկայանի ռուսական ծառայությունը:
Ըստ ռադիոկայանի` արդեն քանի տարի է՝ Վրաստանի ու Թուրքիայի իշխանությունները լարված բանակցություններ են վարում Աջարիայի տարածքում գտնվող մզկիթների վերանորոգման ուղղությամբ, որոնք կառուցվել են դեռ օսմանյան տիրապետության շրջանում: Փոխարենը պաշտոնական Անկարան պատրաստ է Թուրքիայի տարածքում գտնվող բյուզանդական շրջանի վրացական եկեղեցիների վերականգնման համաձայնություն տալ:
Սակայն վրացական ուղղափառ եկեղեցին կտրուկ դեմ է արտահայտվել մզկիթների վերականգնմանը: Բաթումում տեղի ունեցած բողոքի ակցիայի մասնակիցները համաձայնել են վրաց պատրիարքի դիքորոշմանը և իշխանություններին նամակ են հղել, որում նշել են, թե իրենք անընդունելի են համարում Վրաստանում մզկիթ կառուցելը: Ընդ որում, Թուրքիայի պահանջները նամակում Վրաստանին ուղղված վերջնագիր են որակվել:
Հանրահավաքի գլխավոր կազմակերպիչը Վրաստանի Հանրապետական կուսակցության նախկին անդամ Մուրման Դումբաձեն է: Հանրապետականների ղեկավար Դավիթ Ուսուբաշվիլին ռադիոկայանին հայտարարել է, որ իր այդ քայլի համար Դումբաձեն հեռացվել է կուսակցությունից, քանի որ հանրապետականները չեն կիսում նրա կարծիքը:
Վրաստանի մշակույթի նախարարությունում ռադիոկայանի աղբյուրները հայտնել են, որ թեպետ վրաց-թուրքական բանակցությունները հիշյալ հարցի շուրջ շարունակվում են, սակայն վերջնական համաձայնագրի ստորագրման ստույգ ժամկետներ դեռ չեն նշվում: