Վերջերս ԵԱՀԿ գործող նախագահը միայն Երևանում հայտարարեց, որ հայկական կողմը պետք է ետ քաշի իր դիպուկահարներին: Եվ սա այն դեպքում, երբ Սերժ Սարգսյան-Իլհամ Ալիև հանդիպումներից անմիջապես առաջ կամ հետո, ինչպես նաև` համանախագահների տարածշրջան այցերի ժամանակ ադրբեջանական դիպուկահարների կրակոցներից շարունակում են զոհվել հայ զինվորներ:
ՀՅԴ Բյուրոյի Հայ դատի և քաղաքական հարցերով գրասենյակի պատասխանատու Կիրո Մանոյանը այսօր ասաց, որ ԵԱՀԿ գործող նախագահի նման միակողմանի հայտարարությունը սկզբում վրիպում է թվացել, բայց հետո հասկացել է, որ գործող նախագահը լուրջ առաջարկություն է անում հայկական կողմին, ինչն արդեն անհասկանալի է:
«Մենք պատերազմական վիճակում ենք և չենք կարող միակողմանիորեն` լավը երևալու համար, ետ քաշել դիպուկահարներին: Կա անվտանգության հարց, և մենք չենք կարող մեր անվտանգությունը վտանգի տակ դնել։ ԵԱՀԿ գործող նախագահի նման մոտեցումն անընդունելի է, մանավանդ երբ հակառակ կողմն է դիպուկահարներին ավելի շատ կիրառում»,- նշեց նա:
