Թուրքական Ihlas լրատվական գործակալության հաղորդմամբ, Թուրքիայի Գլխավոր շտաբի առջև տեղի է ունեցել բողոքի ցույց` ի պաշտպանություն լիբիական ժողովրդի: Ցույցը կազմակերպել են «Ժողովրդական տներ» կազմակերպության անդամները:
Ցուցարարները կարմիր (արյան) գույնով են ներկել Գլխավոր շտաբի շինության առջև գտնվող աստիճանները և հակաամերիկյան ու հակառազմական կոչեր հնչեցրել` պահանջելով վերջ դնել Լիբիայում ռազմական միջամտությանը: Նրանք դժգոհել են նաև նրանից, որ թուրքական ռազմանավերը միացել են Լիբիայի ծովային շրջափակմանը:
Ապա գործին միջամտել է ոստիկանությունը և ձերբակալել 9 ցուցարարի:
Ձերբակալվածները տարվել են Անկարայի անվտանգության ծառայություն:
Հիշեցնենք, որ օրեր առաջ Էրդողանը հայտարարել էր, թե Թուրքիան երբեք զենք չի բարձրացնի լիբիական ժողովրդի վրա, իսկ արտգործնախարար Ահմեդ Դավութօղլուն էլ հավելել էր, թե Թուրքիան չի դառնա Լիբիայի դեմ ուղղված «խաչակրաց արշավանքի» մասնակիցը:
Չնայած այդ ամենին` Թուրքիան Լիբիայի ծովային շրջափակմանը տրամադրեց 5 ռազմանավ (ֆրեգատ) և 1 սուզանավ:
