Այսօր կկայանա Չեմպիոնների լիգայի խմբային փուլի 8 հանդիպում:
E խմբում ռումինիական «Կլուժ»-ը ընդունելու է Մյունխենի «Բավարիա»-ին: Գերմանական ակումբը բազմաթիվ վնասվածքներից հետո Ռումինիա է մեկնել ընդամենը 15 հոգանոց կազմով: Այսօրվա խաղում մյունխենյան թիմին ոչ-ոչքին էլ է բավարարում: Իսկ խմբի մյուս հանդիպումը կայանալու է Բազելում. տեղի թիմը ընդունելու է Իտալիայի փոխչեմպիոն «Ռոմա»-ին: «Ռոմա»-ն արդեն կրել է 2 պարտություն, եւ եթե հռոմցիները այս խաղում հաղթանակի չհասնեն, ապա Կլաուդո Ռանյերիի թիմը կարող է հրաժեշտ տալ Չեմպիոնների լիգայի խաղարկությանը:
F խմբում Լոնդոնի «Ստենֆըրդ Բրիջ» մարզադաշտում «Չելսի»-ն կհյուրընկալի Մոսկվայի «Սպարտակ»-ին: Չնայած «Չելսի»-ի գլխավոր մարզիչ Կառլո Անչելոտին բազմիցս հայտարարել է, որ իր թիմը միայն հաղթանակի համար է խաղալու, բայց այս խաղում երկու թիմերի համար ոչ-ոքին բավարար արդյունք է համարվում: Խմբի մյուս հանդիպումը կկայանա Սլովակիայում. բացարձակ հետնապահ «Ժիլինա»-ն կընդունի Ֆրանսիայի չեմպիոն Մարսելի «Օլիմպիկի»-ին:
G խմբում ֆրանսիական «Օսեր»-ը կհանդիպի Ամստերդամի «Այաքս»-ի հետ, իսկ «Միլան»-ը կհյուրընկալի արքայական ակումբին`«Ռեալ»-ին: «Օսեր»-ը պարտության դեպքում կկորցնի հաջորդ փուլ դուրս գալու բոլոր հնարավորությունները, իսկ ահա հանրահայտ «Միլան»-ը պիտի անպայման հաղթանակի հասնի, որպեսզի չհայտնվի բարդ իրավիճակում:
H խմբում Դոնեցկի «Դոնբաս» մարզադաշտում Հենրիկ Մխիթարյանի թիմը` «Շախտյոր»-ը, կընդունի խմբի առաջատար անգլիական «Արսենալ»-ին: Ցավոք, Հենրիկ Մխիթարյանը վնասվածքի պատճառով չի մասնակցի հանդիպմանը: «Շախտյոր»-ի գլխավոր մարզիչ Միրչո Լուչեսկուն հայտարարել է, որ «հանքափորները» պիտի անպայման ռեւանշի հասնեն. «Արսենալ»-ի հետ նախորդ հանդիպմանը 1:5 հաշվով պարտություն էին կրել: Խմբի մյուս խաղում Սերբիայի չեմպիոն «Պարտիզան»-ը կընդունի «Բրագա»-ին:
