Հայ հոգեբանների կարծիքով, ի տարբերություն հայ ժողովրդի, ճապոնացիներն ավելի ամուր և կազմակերպված են հաղթահարում երկրաշարժի հետևանքները:
Հոգեբանական գիտությունների դոկտոր Հրանտ Ավանեսյանը լրագրողների հետ զրույցում կարևորեց այն հանգամանքը, որ ճապոնական լրատվամիջոցները ևս առանց խուճապի են լուսաբանում իրենց երկրում տեղի ունեցած աղետը, ավելին` քաղաքական առումով և շատ սրամտորեն նրանք ողջ ուշադրությունը այս պահին սևեռել են ատոմակայանի վրա:
Հոգեբանի խոսքերով, ճապոնացիները այլ պատմություն, այլ մշակույթ և այլ ճանապարհ անցած ժողովուրդ են, և այդ իմաստով մենք` հայերս, չենք կարող համեմատվել նրանց հետ:
Ավանեսյանը խորհուրդ տվեց ժողովրդին և պատասխանատուներին քաջ գիտակցել, որ մենք ևս գտնվում ենք սեյսմիկ ակտիվ գոտում, և պարտադիր չէ, որ ճապոնական երկրաշարժը այստեղ կրկնվի, բայց պետք է ամեն պահի պատրաստ լինել:
Նա նաև տեղեկացրեց, որ այս օրերին շատացել են հոգեորսությամբ զբաղվող կազմակերպությունները, որոնք անընդհատ խոսում են 2012 թ. աշխարհի վերջի մասին և մարդկանց ապացուցում, որ ճապոնական երկրաշարժը, արաբական աշխարհում տեղի ունեցող դեպքերը այդ ամենի նշաններն են, ինչը, սակայն, երևակայական է:
Հոգեբան, հայ-ֆրանսիական «7 դեկտեմբեր 88» բարեգործական ասոցիացիայի նախագահ Հերոլդ Ալեքսանյանն էլ նշեց, թե ճապոնացիների յուրահատկությունն այն է, որ նրանցից յուրաքանչյուրն իրեն համարում է ազգի զինվոր և չի տարանջատում համընդհանուր ազգային խնդիրներից, ինչն էլ շատ հզոր ուժ է: Իսկ հայերը, ըստ հոգեբանի, ծայրահեղական ազգ են` կամ մի խնդրին շատ դրականորեն են մոտենում, կամ էլ՝ չափազանց բացասաբար: