ԱԻՆ հիդրոմետ ծառայության, օդերևութաբանական կանխատեսումների բաժնի պետ Գագիկ Սուրենյանը այսօր «Երկու երես» ակումբում հրավիրված ասուլիսի ընթացքում ասաց, որ ձմռան բոլոր երեք ամիսները կլինեն նորմայից 2-3 աստիճանով բարձր. «Բոլոր երեք ամիսները հանրապետության տարածքում կանխատեսվում է տաք ձմեռ: Օդի ջերմաստիճանը դեկտեմբեր, հունվար և փետրվար ամիսներին սպասվում է բազմամյա միջին ամսական կլիմայական նորմայից մեկից մինչև երեք աստիճանով բարձր, իսկ տեղումների քանակը՝ նորմայից ավել: Այսինքն, եթե ընդհանուր գնահատենք, կունենանք տաք, տեղումնառատ ձմեռ: Մինչև դեկտեմբերի 15-ը դեռևս ձյուն չի կանխատեսվում:
Դեկտեմբերի առաջին տասնօրյակը մեր հանրապետության տարածքում աչքի ընկավ բավականին բարձր ջերմային ֆոնով, բոլոր օրերի ընթացքում օդի ջերմաստիճանը բարձր էր 3-5 աստիճանով, իսկ Լոռիում, Տավուշում և Սյունիքում 2-10 աստիճանով:
Հանրապետության ողջ տարածքում օդի ջերմաստիճանը շարունակում է լինել նորմայից բարձր: Երեկվանից հանրապետությունը գտնվում է բավականին հզոր միջերկրածովյան ցիկլոնի ազդեցության տակ, և ողջ տարածքում դիտվում են տեղումներ, լեռնային շրջաններում՝ ձյան տեսքով, առկա է նաև բուք: Նշեմ, որ այդ շրջաններում ձևավորվել է նաև ձնածածկույթ»:
Գ. Սուրենյանը նշեց նաև, որ տեղումներն այսօր կշարունակվեն մինչև կեսգիշեր, իսկ վաղը կեսօրին եղանակն արդեն կպարզվի. «Առանց տեղումների եղանակը կպահպանվի մինչև դեկտեմբերի 11-ը, իսկ դեկտեմբերի 11-ի օրվա երկրորդ կեսին՝ կրկին առանձին հատվածներում կդիտվեն թույլ տեղումներ: Ինչ վերաբերում է օդի ջերմաստիճանին, ապա ասեմ, որ ջերմաստիճանի անկում սպասվում է դեկտեմբերի 10-ի գիշերը՝ հատկապես լեռնային շրջաններում օդի ջերմաստիճանը Գեղարքունիքի մարզում կնվազի 10-12 աստիճանով: Այնուհետև ջերմաստիճանն անփոփոխ կմնա մինչև դեկտեմբերի 13-ը»: