Ուսումնամեթոդական ուղեցույց՝ ըստ Տիգրան Սարգսյանի:
Վարչապետ Տիգրան Սարգսյանի ուսումնադաստիարակչական լիկբեզները գնալով հետաքրքիր ուղղվածություն են ստանում: Բանն այն է, որ իր այցի շրջանակներում Ավան գյուղի բնակիչներին Տիգրան Սարգսյանը հայրենի կովերին առավել արդյունավետությամբ կթելու մասին մի քանի ցուցում էր տվել:
«Հարգելի գյուղացիներ, օրինակ դուք գիտեք, որ կով կթելուց առաջ պետք է ձեռքերը լվանալ, դույլի վրա մառլյա գցել, կովի կուրծքը տաք ջրով լվանալ, փափուկ սրբիչով չորացնել։ Սրանք տարրական կանոններ են»,- իրեն հատուկ մեղմ տոնով նկարագրել էր Տիգրան Սարգսյանը: Այն, որ վարչապետն ամենատարբեր թեմաներով պարբերաբար դասախոսություններ կարդալու սովորություն ունի` հայտնի է բոլորին: Բայց որ նա ամենայն մանրամասնությամբ կնկարագրեր, ասենք, կովի կուրծքը տաք ջրով լվանալը, փափուկ սրբիչով չորացնելը, նույնիսկ իր կուսակից պատգամավորների համար էր շոկ:
Ընդ որում, կովի կրծքերը տաք ջրով լվանալն ու փափուկ սրբիչով չորացնելը Տիգրան Սարգսյանն այնքան նուրբ ու մանրամասն էր նկարագրել, որ որոշ պատգամավորներ ամենահամարձակ ենթադրություններն էին անում: Սակայն Տիգրան Սարգսյանը կարող է արդարանալ, որ ինքն իր վերադասի հրահանգն է կատարել: Բոլորովին վերջերս Սերժ Սարգսյանը խորհրդակցություն էր հրավիրել գյուղատնտեսության ոլորտի վերաբերյալ և հորդորել էր կանգնել գյուղացու կողքին և աջակցել նրան:
Եվ հիմա Տիգրան Սարգսյանը հետևել է խորհրդին ու կանգնել գյուղացու կողքին: Իհարկե, չի բացառվում, որ մոտ ժամանակներս կրկին գյուղ այցելելիս Տիգրան Սարգսյանը մի դասախոսություն էլ կարդա կովերի ծննդաբերության, հորթուկներին մայրական կաթով սնելու մասին՝ չմոռանալով հիշեցնել իր նախորդ դասախոսությունից հատված. հորթուկին կերակրելուց առաջ ևս պետք է տաք ջրով լվանալ կովի կուրծքը և չորացնել այն փափուկ սրբիչով:
Տիգրան Սարգսյանը գյուղացիներին կարող է խորհուրդներ տալ գարնանացանը ճիշտ կազմակերպելու, քաղհան անելու և բերքահավաքի մասին:
Իսկ մինչ այդ, հանրապետականներից ոմանք մասնավոր զրույցներում չէին թաքցնում իրենց զայրույթն ու զարմանքը Տիգրան Սարգսյանի հայտարարությունների վերաբերյալ: Միայն թե, ոչ բոլորն էին պատրաստ այս թեմայով իրենց կարծիքը հայտնել բարձրաձայն:
Միայն ՀՀԿ-ական Ռաֆիկ Պետրոսյանն էր, որ ըստ էության, խոսեց այս թեմայով. «Ես կարծում եմ՝ վարչապետը չպետք է այդպես սովորեցներ, թե ինչպես են կով կթում կամ կաթը մաքրում: Ամենաշատը դա պետք է աներ գյուղնախարարը կամ վարչության պետերից մեկը: Բայց եթե նա անհրաժեշտ է գտել այդ մասին խոսելու, ինչ ասեմ՝ թող հասարակությունը գնահատի»:
ԱԺ ՀՀԿ խմբակցության ղեկավար Գալուստ Սահակյանը փորձեց մեղմել իրավիճակը և համոզել, որ Տիգրան Սարգսյանն այդ հայտարարություններն արել է մտերմիկ զրույցում, և պետք չի դրանք քաղաքական քննարկումների թեմա դարձնել: «Ես մտածում եմ՝ վարչապետը մթնոլորտում է եղել և բարի խոսքի դրսևորմամբ զրուցել է մարդկանց հետ», – ասաց պարոն Սահակյանը:
Հ.Գ. Տիգրան Սարգսյանի խոսքերից տպավորություն էր, որ նա ընդամենը վերջերս է կարդացել է հնդիկ բուդդա Աման Վեզիրի «Կովին, կերակրողին» վերնագրով աշխատությունը, որտեղ ամենայն մանրամասնությամբ նկարագրվում է հնդիկ գյուղացու և կովի անշահախնդիր սիրո պատմությունը։ Իսկ այսքանից հետո մնում է հուսալ, որ կովերի հանդեպ նորահայտ սիրո պատճառով հայկական տոնացույցն իր հայեցողությամբ ձևող Տիգրան Սարգսյանը մարտի 22-ը՝ դեռ չկթված կովի հանդեպ վարչապետի հոգատարության մասին ՀՀ քաղաքացիների իրազեկման օրը, չի հռչակի «Կովի օր»։
«Ժամանակ» օրաթերթ