Գեղարքունիքի մարզի Ծակքար համայնքի մշակույթի տունը շահագործումից մինչ օրս ոչ մի անգամ չի վերանորոգվել: 30 տարվա ընթացքում շարքից դուրս են եկել մշակույթի տան պատուհանները, սենյակները, գույքն ու տանիքը: Շուրջ 1000 քառակուսի մետր տարածք զբաղեցնող տանիքի վերանորոգման համար համայնքն անհրաժեշտ ֆինանսական միջոցներ չունի: Հույսները դրել են պետության վրա:
Համայնքի բնակիչ Վանիկ Հակոբյանը շատ լավ է հիշում այն օրը, երբ Սերժ Սարգսյանը 2008 թվականի նախընտրական քարոզարշավի ժամանակ իրենց գյուղում էր ու խոստացավ անպայման աջակցել մշակույթի տան վերանորոգմանը: «Խոստացավ, գնաց, ընտրվեց, մեզ էլ մոռացավ»,- ավելացնում է Շահեն պապը:
Մշակույթի տան տնօրեն Դիմիկ Համբարձումյանի խոսքով, բազմիցս հարցը ներկայացրել են Գեղարքունիքի մարզպետարան: «Ամեն անգամ խոստանում են, որ կվերանորոգեն, բայց ոչ մի անգամ էլ սայլը տեղից չի շարժվում»,- ասում է Դիմիկ Համբարձումյանը: Չնայած վթարային պայմաններին՝ այնուամենայնիվ, կառույցի մի մասն օգտագործվում է: Մշակույթի տան շենքում են տեղակայված գրադարանը, ծերերի ժամանցի համար նախատեսված խաղասրահը, պարի և ըմբշամարտի խմբակները:
Վերջին երկու խմբակները գործում են տարվա միայն 6 ամիսներին, քանի որ շենքը չի ջեռուցվում: Տարիների ընթացքում քայքայված ջեռուցման համակարգը վերականգնելու համար ևս մեծ գումար է անհրաժեշտ:
«Փչացել է տանիքի թիթեղների 70 տոկոսից ավելին: Ուժեղ քամիրների հետևանքով ջարդվել է շենքի պատուհանների մեծ մասը: Մի խոսքով, կառույցը ֆիզիկապես մաշվել է, չնայած բարոյական մաշվածության մասին դեռ վաղ է խոսել, սակայն եթե այսպես շարունակվի, շատ շուտով նաև բարոյական մաշվածության կարող է ենթարկվել»,- նշում է մշակույթի տան հաշվապահ Բայանդուր Հովհաննիսյանը:
Ի դեպ, վերջերս Սյունիքի մարզում գտնվող ՀՀ փոխվարչապետը հայտարարեց, որ առաջիկայում պետք է իրագործվեն ՀՀ նախագահի նախըտրական ծրագրի բոլոր խոսոտումները:
Գուցե Ծակքարի մշակույթի տո՞ւնն էլ հիշի Արմեն Գևորգյանը: