Վրաստանի և Ֆրանսիայի հարաբերություններում խոշոր սկանդալ է հասունանում,- հաղորդում է ռուսական “Коммерсантъ-Online”-ը:
Թբիլիսիում Ֆրանսիայի դեսպան Էրիկ Ֆուրնիեն խիստ քննադատել է վրացական իշխանություններին` նրանց մեղադրելով ծայրահեղականության և ժողովրդավարական ինստիտուտներ ձևավորելու հարցում անկարողության մեջ: Արևմտյան դիվանագետի նմանօրինակ խիստ ելույթ չէր եղել Վրաստանի անկախության ողջ 20 տարիների ընթացքում:
Ֆրանսիացի դիվանագետի աննախադեպ հայտարարությունը հնչել էր Թբիլիսիում Սորոսի կողմից ֆինանսավորվող «Վրաստան – բաց հասարակություն» հասարակական կազմակերպության զեկույցի ներկայացման ժամանակ, որը վերաբերում էր Եվրամիության «Արևելյան գործընկերության» շրջանակներում Վրաստանի ստանձնած պարտավորությունների կատարմանը: Վրաստանը ցանկանում է Եվրամիության անդամության կարգավիճակ ստանալ և նախատեսում է առաջիկայում Բրյուսելի հետ ազատ առևտրային գոտու մասին պայմանագիր կնքել: Վրացական իշխանությունները նաև հույս ունեն ԵՄ երկրներ առանց վիզայի մուտքի կարգավիճակ ստանալ: Սակայն ԵՄ-ն վերջերս ընդամենը պարզեցրեց մուտքի վիզաների տրամադրման ընթացակարգը Վրաստանի քաղաքացիների որոշ խավերի համար, որոնք մինչ այդ էլ դժգոհ չէին շենգենյան վիզաներ ստանալու հարցում:
Հիշյալ քննարկմանը, որը ոչնչով չէր առնձնանում մինչ այդ եղած բազմաթիվ նման միջոցառումներից, հանկարծ Ֆրանսիայի դեսպանը վեր է կացել ու լրագրողների ներկայությամբ հայտարարել հետևյալը.
«Վրաստանում Եվրամիության բոլոր ջանքերը ապարդյուն են թվում, քանզի ոչ մի առաջընթաց չկա: Չկա խոսքի ազատություն, ոչ մի զարգացում տնտեսության մեջ: Սա պարզապես աղետ է: Այնպիսի տպավորություն է, որ մենք գտնվում ենք նեոբոլշևիկյան մի պետությունում, որտեղ ազատություններ գոյություն չունեն»:
Այնուհետև դեսպանը անցել է սպառնալիքների` հասկացնելով, որ հնարավոր է՝ ԵՄ-ն պատժամիջոցներ կիրառի Վրաստանի նկատմամբ: Ճիշտ է, հետո Ֆրանսիայի դեսպանատնից բացատրել են, որ նման ձևակերպումներ դեսպանը չի արտահայտել, այլ լրագրողներն են նրա խոսքերից իրենց ցանկացած կտորը վերցրել, սակայն դա այնքան էլ չի մեղմել մթնոլորտը, քանի որ մինչ այդ էլ ԱՄՆ դեսպանն էր խիստ արտահայտություններով հանդես եկել` վրացական իշխանություններին մեղադրելով ժողովրդավարացման թույլ ընթացքի և ԶԼՄ-ներին քիչ ազատություններ ընձեռելու համար:
Սա կարող է վկայել այն մասին, որ Արևմուտքը այնքան էլ գոհ չէ Սաակաշվիլու կառավարումից, և կաջակցի մեկ այլ քաղաքական գործչի, որը իրական հավակնություններ կներկայացնի նախագահի աթոռի համար,- եզրակացնում է ռուսական “Коммерсантъ-Online”-ը:
