Թուրքական Cumhuriyet թերթի փոխանցմամբ, Ստամբուլի հանրապետական դատախազ Զեքերիա Օզը թուրքական ոստիկանությանը հրահանգել է խուզարկություն իրականացրել Ստամբուլի «Իթհաքի» հրատարակչատանը` փնտրելու համար «Էրգենեքոնի» գործի շրջանակներում ձերբակալված լրագրող Ահմեթ Շըքի հրապարակվելիք «Իմամի բանակը» խորագրով գիրքը:
Մոտ 7 ժամ տևած որոնումներն արդյունք չեն տվել, ինչից հետո ոստիկանության աշխատակիցները հեռացել են:
Այդ խուզարկությունը հարուցել է հրատարակչատան սեփականատեր Ունալ Քոչանի խոր զարմանքը: Նա հայտարարել է, որ իրենք դեռևս չեն կողմնորոշվել այդ գրքի հրատարակման հարցում, մինչդեռ ոստիկանությունն արդեն ընկել է դրա հետևից:
Ահմեթ Շըքի կնոջ կարծիքով, այդ գրքի մասին ոստիկանությունը տեղեկացել է իրենց հեռախոսների գաղտնալսման արդյունքում:
Հիշեցնենք, որ Ահմեթ Շըքը «Էրգենեքոնի» գործի շրջանակներում ձերբակալվել է մարտի սկզբին, ինչի պատճառն, ամենայն հավանականությամբ, այն է, որ նա սեփական հետաքննությունն էր անցկացրել այդ գործով:
