Ռուսաստանը Մինսկի խմբում այլևս չի կարող աշխատել ԱՄՆ-ի հետ միասին, քանի որ ՌԴ-ն ու ԱՄՆ-ը պատերազմի մեջ են, իսկ Մինսկի խմբի աշխատանքը կաթվածահար է: «Առաջին լրատվական»-ի հետ զրույցում այս մասին ասաց Պետդումայի նախկին պատգամավոր, ՌԴ քաղաքական հետազոտությունների կենտրոնի ղեկավար, ՌԴ հանրային պալատի ներկայացուցիչ, քաղաքագետ-տնտեսագետ Սերգեյ Մարկովը՝ անդրադառնալով Սոչիում օգոստոսի 9-ին Ալիև-Սարգսյան հանդիպմանն ու ԼՂ հակամարտության կարգավորման ռուսական մոտեցումներին:
Նա Սոչիի հանդիպման ելքի մի քանի վարկած է կանխատեսում:
«Առաջինը՝ շփման գծում լարվածության պայմաններում նախագահները կհրաժարվեն հանդիպումից, և հանդիպումը կտապալվի: Երկրորդ՝ հնարավոր է՝ կայանա հանդիպումը, բայց ավարտվի առանց էական արդյունքի՝ միայն փոխադարձ մեղադրանքներ և ոչ մի իրական արդյունք: Երրորդ՝ հաշտության վարկածը, հանդիպումը կկայանա, կողմերը կպայմանավորվեն ինչ-որ լուծման շուրջ, և փոխհրաձգությունը կթուլանա: Չորրորդ՝ բանակցությունների վերսկսման մեկնարկ, որոնք պետք է սկսվեն զիջումներով և որոշակի շրջանների վերադարձով:
Թե այդ տարբերակներից որն է ավելի իրատեսական՝ դժվար է ասել: Իմ կարծիքով՝ առավել հավանական է երկրորդ տարբերակը՝ կհանդիպեն, բայց որևէ էական հարցի շուրջ համաձայնության չեն գա»,- նշեց Մարկովը:
Վերջինս նաև պարզաբանեց, թե ինչու է Ռուսաստանն առանձնացել ԵԱՀԿ Մինսկի խմբի մյուս համանախագահ երկրներից՝ վարելով իր առանձին քաղաքականությունը:
Մարկովն ասաց, որ ԼՂ հարցում Մինսկի խմբի աշխատանքը կաթվածահար է, քանի որ ԱՄՆ-ն ու ՌԴ-ն գտնվում են փաստացի պատերազմի մեջ, ուստի դժվար է պատկերացնել, որ նրանք կարող են համատեղ աշխատել: Չնայած միջազգայնագետների դիտարկումներին ու հավաստիացումներին, թե Ռուսաստանն ապակայունացնում է ԼՂ հակամարտության գոտին՝ խաղաղապահների տեղակայման և տարածաշրջանում իր ազդեցության ավելի ամրապնդման նպատակով, նա պնդեց, որ ՌԴ-ն ձգտում է ԼՂ հակամարտության կարգավորման, քանի որ շահագրգռված է իր սահմաններին խաղաղության հաստատմամբ, դրանով էլ պայմանավորված է իր խաղաղ նախաձեռնությունը:
Հիշեցնենք, որ Հայաստանի Հանրապետության նախագահ Սերժ Սարգսյանը օգոստոսի 8-ին աշխատանքային այցով կմեկնի Սոչի: Օգոստոսի 9-ին կկայանա Հայաստանի Հանրապետության նախագահի հանդիպումը Ռուսաստանի Դաշնության նախագահ Վլադիմիր Պուտինի հետ:
Հայկական կողմը պատրաստակամություն է հայտնել այցի շրջանակում անցկացնել նաև եռակողմ հանդիպում՝ Ռուսաստանի Դաշնության և Ադրբեջանական Հանրապետության նախագահների հետ` քննարկելու համար ղարաբաղյան հակամարտության խաղաղ կարգավորման խնդիրները, ինչպես նաև վերջին օրերին Ադրբեջանի կողմից հրահրված լարման արդյունքում ստեղծված իրավիճակը:
