Մեծ Բրիտանիան հետ է կանչում Եմենում իր դեսպանատան մի շարք աշխատակիցների, քանի որ արաբական այդ երկրում շարունակվում են բախումները: Մեծ Բրիտանիայի քաղաքացիներին նույնպես խորհուրդ է տրվել լքել Եմենը, քանի որ այդտեղ իրավիճակը գնալով լարվում է: Այս մասին հաղորդում է BBC-ն:
Մեծ Բրիտանիայի արտաքին գործերի նախարարության ներկայացուցիչը նշել է, որ բրիտանական կառավարությունը պնդում է, որպեսզի իր երկրի քաղքացիները լքեն Եմենը առնվազն երկու շաբաթով, քանի որ հյուպատոսական ծառայության աշխատանքների դադարեցման պայմաններում բրիտանական քաղաքացիների շահերը չեն կարող պատշաճ պաշտպանվել:
ԱՄՆ-ն նույնպես արձագանքել է իրավիճակին Եմենում: Պաշտպանության նախարար Ռոբերտ Գեյթսը հայտարարել է, որ ԱՄՆ դիրքրոշումն այս հարցի շուրջ դեռ ձևավորված չէ: Նա նշել է, որ դեռ վաղ է ինչ-որ գնահատականներ տալ այդ երկրում հետագա զարգացումների վերաբերյալ: Գեյթսը նաև ասել է, որ ԱՄՆ-ն ավանդաբար լավ հարաբերություններ է ունեցել Եմենի նախագահ Ալի Աբդալլահ Սալեհի հետ, և որ Վաշինգտոնը շարունակում է հետևել իրադարձությունների զարգացմանը Եմենում: Այս մասին հաղորդում է Associated Press գործակալությունը:
Եմենում արգելվել է Al-Jazeera հեռուստաալիքի հեռարձակումը, քանի որ այն, ըստ եմենյան իշխանությունների, աջակցում է երկրի ապստամբներին` տարածելով սխալ տեղեկատվություն: Նախօրեին Եմենի հատուկ ծառայությունները առգրավել էին Al-Jazeera-ի Եմենի գրասենյակի սարքավորումները` դժվարացնելով հեռուստաընկերության աշխատանքներն այդ երկրում:
Հիշեցնենք, որ Եմենում հունվարի վերջից տեղի են ունենում բազմահազարանոց բողոքի ակցիաներ, որի ժամանակ ցուցարարները պահանջում են երկրի նախագահի հրաժարականը: Այս ցույցերի ժամանակ մի քանի հարյուր մարդ զոհվել է, հազարները վիրավորվել են: Իրավիճակի ծայրահեղ սրման պայմաններում, երեկ Եմենում մտցվել է արտակարգ դրություն, դադարեցվել է սահմանադրության գործողությունը, սահմանփակվել են ԶԼՄ-ների աշխատանքը:
