Երկրապահ կամավորական միության անդամ, ԱԺ պատգամավոր Առաքել Մովսիսյանը՝ Շմայսը, որը նաև համարվում է Արցախյան ազատամարտի մասնակից, «Առաջին լրատվական»-ի հետ զրույցում չցանկացավ խոսել ղարաբաղա-ադրբեջանական շփման գծում ստեղծված լարված վիճակի մասին: Նա հայտարարեց, որ ինքն այնպիսի տեղում է, որ չի կարող իր գտնվելու վայրը հայտնել, և որ այդ թեմայով չի կարելի հեռախոսով խոսել:
«Ես հեռախոսով ինֆորմացիա չեմ կարող տալ, էս խառը վիճակում հեռախոսով չի կարելի խոսել: Համ էլ ես տարածքում չեմ»: Հայաստանում չե՞ք՝ հետաքրքրվեցինք: «Հայաստանում եմ, պարզապես չեմ կարող իմ տեղն ասել, դա գաղտնիք է և չեմ կարող հեռախոսով խոսել»,- ասաց նա:
Առաքել Մովսիսյանից հետաքրքրվեցինք ՝ պատերազմ սկսվելու դեպքում պատրա՞ստ է ռազմաճակատ մեկնել և մասնակցել կռվին, ինչպես նաև անհրաժեշտության դեպքում իր կուտակած հարստությունից միջոցներ տրամադրել: «Ուրեմն, ես արդեն էդ ուղղությամբ աշխատում եմ, արդեն երեք անգամ գնացել եկել եմ, բացի այդ էլ, իմ զորքը իմ կողքին կանգնած ա, բոլորին արդեն իմաց եմ տվել, և բոլորն արդեն պատրաստ են, բայց Աստված մի արասցե: Էդքան բան կարամ ասեմ: Մնացած հարցերով չեմ կարող խոսել»,- ասաց ԱԺ պատգամավորն ու անջատեց հեռախոսը:
