Դմիտրի Մեդվեդևի կառավարությունը հրաժարական կտա 2013թ. մարտ-ապրիլին: Նման կանխատեսում է կատարել Գլոբալիզացիայի խնդիրներով ինստիտուտը, որի զեկույցը հայտնվել է «Իզվեստիայի» տրամադրության տակ:
Միխայիլ Դելյագինի ինստիտուտում որպես հրաժարականի պատճառ նշել են Ռուսաստանի իշխող շրջանակներում «միջկլանային պատերազմը», որը Նոր տարու գալուն զուգահեռ ի չիք կդառնա, սակայն կթուլացնի Մեդվեդևին ու «լիբերալ կլանը»:
Հավելյալ գործոն, որը կարագացնի կառավարության հրաժարականը, ըստ ինստիտուտի, կդառնա Գյուղատնտեսության նախկին նախարար Ելենա Սկրիննիկի շուրջ սկանդալը, ով համարվում է Մեդվեդևի մերձավորներից:
Նոյեմբերին «Ռոսիա-1» հեռուստաալիքը հրապարակել էր նյութ, որտեղ նշվում էր, որ Սկրիննիկն առնչություն ունի «Ռոսագրոլիզինգ» ընկերությունում հնարավոր խարդախության հետ:
Փորձագետները Մեդվեդևի հնարավոր փոխարինող են համարում Դմիտրի Ռոգոզինին:
Ինչպես գրում է «Իզվեստիան», Դելյագինի կանխատեսման հետ համաձայն է Գլեբ Պավլովսկին: «Կրեմլը չի թաքցնում, որ դա կցանկանար,- հայտարարել է Էֆեկտիվ քաղաքականության հիմնադրամի ղեկավարը,- հարցն այն է, թե Վլադիմիր Պուտինը ինչ կարող է Մեդվեդևին առաջարկել փոխարենը»:
Իր հերթին, Ժամանակակից զարգացման ինստիտուտի ղեկավար Իգոր Յուրգենսը չի բացառել ՌԴ վարչապետի հրաժարականը, սակայն չի համաձայնել ժամկետների հետ: Նրա խոսքվ՝ կառավարությունն այսքան արագ չեն փոխում:
Մեկնաբանելով Մեդվեդևի հրաժարականի մասին կանխատեսումները՝ «Իզվեստիայի» հետ զրույցում նրա մամլո քարտուղար Նատալյա Տիմակովան հայտարարել է, որ «կառավարության հրաժարականի կանխատեսումներն ավելի շատ հաջողվել են պայծառատես Վանգային, քան թե փորձագետներին»:
