Երևանի քաղաքապետ Տարոն Մարգարյանն այսօր ծանոթացավ Աջափնյակ վարչական շրջանում կառուցվող երկու բազմաբնակարան շենքերի շինարարական աշխատանքներին, որոնց կառուցումից հետո այնտեղ պետք է տեղափոխվեն Երևանի 4-րդ կարգի վթարային շենքերի բնակիչները:
2012 թվականից այս ուղղությամբ տարված աշխատանքներից հետո 200 բնակարան արդեն իսկ հանձնվել է 4-րդ կարգի վթարային շենքերի բնակիչներին: Այս պահին, քաղաքապետի խոսքով, ևս 450 բնակարանի պահանջ կա:
«Այս խնդիրը մեր ուշադրության կենտրոնում է: Աջափնյակ վարչական շրջանում կառուցվում են 4 բազմաբնակարան շենքեր, և դրանով մենք կարողանում ենք ամբողջությամբ լուծել այս խնդիրը: Հուսով եմ՝ 2015 թվականի հոկտեմբերին ամբողջությամբ ավարտին կհասցնենք շենքերի կառուցումը, դրանք կհանձնվեն շահագործման, և այդ 450 ընտանիքները կապահովվեն բնակարանով»,- ասաց Տարոն Մարգարյանը:
Վերջինիս խոսքով՝ բացի 4-րդ կարգի վթարային շենքերից, քաղաքում առկա են նաև 70-ից ավելի բազմաբնակարան 3-րդ կարգի վթարային շենքեր, որոնք շատ կարճ ժամանակահատվածում կարող են դառնալ 4-րդ կարգի վթարային:
«Հետևաբար քայլեր պետք է ձեռնարկենք, ամրացման աշխատանքներ տանենք, որ դրանք վթարային չդառնան: …Սա լինելու է շարունակական, և այստեղ կառավարության մեծ աջակցությունը կա»,- հավելեց քաղաքապետը:
Նա նաև նկատեց, որ վթարայինից նորակառույց շենքեր տեղափոխվելիս բնակարանների մակերեսները պահպանվում են, իսկ երբեմն էլ ավելի են լինում: